ગૂગલ ડૂડલ શ્રીદેવી જન્મ જયંતિ: બોલિવૂડમાં ‘લેડી અમિતાભ બચ્ચન’ તરીકે ઓળખાતી જાણીતી અભિનેત્રી શ્રીદેવીનો આજે જન્મદિવસ છે. શ્રીદેવીનો જન્મ 13 ઓગસ્ટ 1963ના રોજ તમિલનાડુમાં થયો હતો. તેણે લગભગ ચાર દાયકા સુધી ફિલ્મ ઈન્ડસ્ટ્રીમાં કામ કર્યું. આ દરમિયાન તેણે 300 થી વધુ ફિલ્મોમાં પોતાની અભિનય શક્તિ દેખાડી. બોલિવૂડ હોય કે સાઉથ સિનેમા, શ્રીદેવીની ગણતરી આજે પણ શ્રેષ્ઠ અભિનેત્રીઓમાં થાય છે. શ્રીદેવીનો અભિનય પ્રત્યેનો પ્રેમ એ વાત પરથી સ્પષ્ટ થાય છે કે તેણે માત્ર ચાર વર્ષની ઉંમરે તેની ફિલ્મી કરિયરની શરૂઆત કરી હતી.
ચાર વર્ષની ઉંમરે અભિનયની શરૂઆત કરી
ગૂગલે શ્રીદેવીના જન્મદિવસના અવસર પર એક ખાસ ડૂડલ શેર કર્યું છે. ગૂગલે આ ખાસ ડૂડલ દ્વારા ફિલ્મ ઈન્ડસ્ટ્રીમાં શ્રીદેવીની સફર બતાવવાનો પ્રયાસ કર્યો છે. શ્રીદેવીને ડૂડલ સમર્પિત કરતી વખતે ગૂગલે લખ્યું છે – તેણે બાળપણમાં જ ફિલ્મોને પ્રેમ કરવાનું શરૂ કર્યું હતું, માત્ર ચાર વર્ષની ઉંમરે તે તમિલ ફિલ્મ ‘કંધન કરુણાઈ’માં જોવા મળી હતી. શ્રીદેવીએ દક્ષિણ ભારતની ઘણી ભાષાઓ બોલતા શીખી હતી. આ જ કારણ છે કે બોલિવૂડ સિવાય તેને સાઉથ સિનેમાની બીજી ઘણી ભાષાઓની ફિલ્મોમાં કામ કરવાની તક મળી.