Gujarat IAS Transfer 2026: ગુજરાત સરકારે એક મહત્વપૂર્ણ વહીવટી ફેરબદલમાં રાજ્યના ત્રણ સિનિયર IAS અધિકારીઓની બદલી કરી છે. અત્યાર સુધી સુરત મહાનગરપાલિકાના કમિશનરની જવાબદારી સંભાળતા શાલિની અગ્રવાલને સરકારે નવી જવાબદારી સોંપી છે. સરકારે તેમને ઉર્જા અને પેટ્રોકેમિકલ્સ વિભાગ હેઠળ આવતા ગુજરાત ઉર્જા વિકાસ નિગમ લિમિટેડ (GUVNL), વડોદરાના MD બનાવ્યા છે. અત્યાર સુધી આ જવાબદારી IAS જેનુ દેવન પાસે વધારાના ચાર્જ તરીકે હતી. શાલિની અગ્રવાલ અગાઉ વડોદરા મહાનગરપાલિકાના કમિશનર અને જિલ્લા કલેક્ટર રહી ચૂક્યા છે, તેથી એક રીતે તેમની વડોદરા વાપસી થઈ છે. ૨૦૦૫ બેચના IAS શાલિની અગ્રવાલે બિહાર યુનિવર્સિટીમાંથી એન્જિનિયરિંગનો અભ્યાસ કર્યો છે.
નાગરાજન બન્યા સુરતના કમિશનર
મુખ્યમંત્રી ભૂપેન્દ્ર પટેલની આગેવાની હેઠળની રાજ્ય સરકારે ૨૦૦૯ બેચના IAS નાગરાજન એમ.ને ઉપાધ્યક્ષ અને મેનેજિંગ ડિરેક્ટર, ગુજરાત રાજ્ય માર્ગ વાહન વ્યવહાર નિગમ (GSRTC), અમદાવાદથી હટાવીને સુરત મોકલ્યા છે. તેઓ હવે સુરતના નવા મ્યુનિસિપલ કમિશનર હશે. નાગરાજન શહેરી વિકાસ અને શહેરી આવાસ વિભાગની જવાબદારી પણ સંભાળતા હતા. હવે તેઓ માત્ર સુરત મહાનગરપાલિકાની જવાબદારી સંભાળશે.
ડો. રાજેન્દ્ર કુમારને વધારાની જવાબદારી
સરકારે ૨૦૦૪ બેચના IAS ડો. રાજેન્દ્ર કુમાર, જેઓ વાહનવ્યવહાર કમિશનર, ગાંધીનગર તરીકે કાર્યરત છે, તેમને GSRTC ના ઉપાધ્યક્ષ અને મેનેજિંગ ડિરેક્ટરના પદનો વધારાનો હવાલો સોંપ્યો છે. ગુજરાત સરકારે ૧૯ જાન્યુઆરીએ એક આદેશમાં GAS અધિકારી બી. એન. પટેલને ગુજરાત ગેસ લિમિટેડ ગાંધીનગરના એક્ઝિક્યુટિવ ડિરેક્ટર બનાવ્યા હતા. ગુજરાતમાં આગામી દિવસોમાં વધુ કેટલીક બદલીઓ થવાની શક્યતા વ્યક્ત કરવામાં આવી રહી છે, જેમાં અનેક IAS અધિકારીઓના કામકાજમાં ફેરફાર થઈ શકે છે. ગુજરાત સરકારે ડિસેમ્બરમાં CMO માં પણ નવા IAS ની નિમણૂક કરી હતી.
