ગુજરાત બનશે દેશનું ‘સ્પોર્ટ્સ હબ’: સ્પોર્ટ્સ સ્ટાર્ટઅપ કોન્કલેવ દ્વારા રમતગમત ક્ષેત્રે નવી ક્રાંતિનો પાયો નંખાયો
વર્ષ ૨૦૩૦ની કોમનવેલ્થ ગેમ્સની યજમાની સાથે ‘વિકસિત ગુજરાત’થી ‘વિકસિત ભારત’ના સ્વપ્નને સાકાર કરવા રાજ્ય સરકાર સજ્જ
એશિયન વોલીબોલ મેન્સ કપ-૨૦૨૬ અંતર્ગત જૂન-૨૦૨૬માં અમદાવાદ ખાતે ૧૨ દેશોની ટીમો વચ્ચે સ્પર્ધા થશે.
મણિનગર-અમદાવાદના ધારાસભ્ય શ્રી અમૂલ ભટ્ટ દ્વારા રજૂ કરાયેલ ‘ગુજરાત સ્પોર્ટ્સ સ્ટાર્ટઅપ કોન્કલેવ-૨૦૨૩‘બિન-સરકારી સંકલ્પ વિધાનસભા ગૃહમાં સ્વીકારાયો
ગુજરાત વિધાનસભા ખાતે ‘ગુજરાત સ્પોર્ટ્સ સ્ટાર્ટઅપ કોન્કલેવ-૨૦૨૩’ ના મહત્વપૂર્ણ વિષય પર રજૂ થયેલા બિન-સરકારી સંકલ્પને ટેકો આપતા રમત-ગમત રાજ્ય મંત્રી ડૉ. જયરામ ગામીતે જણાવ્યું હતું કે, મુખ્યમંત્રી શ્રી ભૂપેન્દ્ર પટેલ અને નાયબ મુખ્યમંત્રી શ્રી હર્ષ સંઘવીના નેતૃત્વમાં ગુજરાત રમત ગમત અને ઉદ્યોગ સાહસિકતાના સમન્વય સાથે ‘નવા ભારત’ના નિર્માણ માટે અગ્રેસર છે. તા. ૧૧ ડિસેમ્બર, ૨૦૨૩ના રોજ આયોજિત પ્રથમ સ્પોર્ટ્સ સ્ટાર્ટઅપ કોન્કલેવ માત્ર એક કાર્યક્રમ નહોતો, પરંતુ ગુજરાતની સ્પોર્ટ્સ ઇકોસિસ્ટમમાં એક નવી ક્રાંતિનો પાયો હતો.
ગુજરાત આગામી વર્ષોમાં વૈશ્વિક રમત ગમત નકશા પર ચમકવા જઈ રહ્યું છે,ત્યારે મંત્રી શ્રી ગામીતે આગામી આયોજનોની વિગતો આપતા જણાવ્યું હતું કે,એશિયન વેઇટલિફ્ટિંગ ચેમ્પિયનશિપ-૨૦૨૬ અંતર્ગત ગાંધીનગર ખાતે તા. ૧ થી ૧૦ એપ્રિલ દરમિયાન ૨૫થી વધુ દેશોના ખેલાડીઓ ભાગ લેશે.
આ ઉપરાંત એશિયન વોલીબોલ મેન્સ કપ-૨૦૨૬ અંતર્ગત જૂન-૨૦૨૬માં અમદાવાદ ખાતે ૧૨ દેશોની ટીમો વચ્ચે સ્પર્ધા થશે. વધુમાં વર્લ્ડ પોલીસ અને ફાયર ગેમ્સ-૨૦૨૯માં અમદાવાદ ખાતે વિશ્વભરના પોલીસ અને ફાયર જવાનો ભાગ લેશે. કોમનવેલ્થ ગેમ્સ-૨૦૩૦ મેગા ઇવેન્ટ ગુજરાતને ભારતની રમતગમતની રાજધાની તરીકે પ્રસ્થાપિત કરશે.
રમતગમતના વિકાસ માટે રાજ્ય સરકાર દ્વારા લેવાયેલા મહત્વના નિર્ણયો અંગે મંત્રીશ્રીએ કહ્યું હતું કે,ગુજરાત સરકાર દ્વારા અમદાવાદ ખાતે રૂ. ૫૦૦ કરોડના ખર્ચે એક્વેટિક સ્ટેડિયમ અને સ્પોર્ટ્સ એક્સેલન્સ ઇન્સ્ટિટ્યૂટનું નિર્માણ કરવામાં આવશે. આ ઉપરાંત ગાંધીનગર ખાતે દિવ્યાંગ ખેલાડીઓ માટે રૂ. ૧૦૦ કરોડના ખર્ચે અત્યાધુનિક પેરા હાઈ પરફોર્મન્સ સેન્ટરની કામગીરી પ્રગતિમાં છે. આ ઉપરાંત રાજ્ય સરકાર દ્વારા નવીન મહાનગરપાલિકાઓ અને નગરપાલિકાઓમાં રમત ગમત સંકુલોના નિર્માણ માટે પણ રૂ. ૧૦ કરોડની જોગવાઈ કરવામાં આવી છે. વધુમાં હાલ ૩૧ રમત સંકુલો કાર્યરત છે અને અન્ય ૧૫ જિલ્લા તથા ૧૮ તાલુકામાં રમત સંકુલોનું કામ પ્રગતિ હેઠળ છે.
મંત્રીશ્રીએ ઉમેર્યું હતું કે,રાજ્યમાં‘ખેલ મહાકુંભ’દ્વારા રમત સંસ્કૃતિનો વિકાસ થયો છે,જેમાં વર્ષ ૨૦૨૫માં ૭૨ લાખથી વધુ રમતવીરોએ નોંધણી કરાવી હતી. આ ઉપરાંત દિવ્યાંગ વિજેતા ખેલાડીઓને રૂ. ૫ હજારથી લઈને રૂ. ૫ કરોડ સુધીના રોકડ પુરસ્કારો આપવામાં આવે છે. અત્યાર સુધીમાં કુલ ૧,૮૫૦ ખેલાડીઓને રૂ. ૨૮.૫૯ કરોડના પુરસ્કારો એનાયત કરવામાં આવ્યા છે.
ઇનસ્કુલ અનેDLSSયોજના વિશે માહિતી આપતા મંત્રીશ્રીએ ઉમેર્યું હતું કે,રાજ્યના ૩૯ જિલ્લા કક્ષાની સ્પોર્ટ્સ સ્કૂલોમાં ૫,૩૬૧થી વધુ તાલીમાર્થીઓને વિનામૂલ્યે શિક્ષણ,ભોજન અને વૈજ્ઞાનિક ઢબે તાલીમ આપવામાં આવે છે.‘ખેલ સહાયક યોજના’અંતર્ગત ૧,૫૦૦ જેટલા ખેલ સહાયકોની ભરતી કરવામાં આવી છે,જ્યારે ૨,૩૦૦થી વધુ કાયમી વ્યાયામ શિક્ષકો હાલ કાર્યરત છે.
આમ,સ્પોર્ટ્સ સ્ટાર્ટઅપ્સને પ્રોત્સાહન આપીને ગુજરાત માત્ર ખેલાડીઓ જ નહીં,પરંતુ સ્પોર્ટ્સ ગુડ્સ મેન્યુફેક્ચરિંગ અને ટેકનોલોજી ક્ષેત્રે પણ વિશ્વનું હબ બનવા તરફ પ્રયાણ કરી રહ્યું છે,તેમ મંત્રીશ્રીએ ઉમેર્યું હતું.
