અમદાવાદ , સેટેલાઈટમાં રહેતા વેપારીને શેરબજારમાં રોકાણ કરી મોટું વળતર આપવાની લાલચ આપીને લાયન્સ ક્લબના પૂર્વ પ્રમુખ અને સભ્યે કુલ શ્ ૪.૦૪ કરોડની છેતરપિંડી આચરી છે.
આરોપીએ શેરબજારમાં રોકાણ કરવાની વાત કરીને પત્ની, માતા અને ભાગીદારના નામે આખું રેકેટ ચલાવીને અનેક લોકો સાથે છેતરપિંડી આચરી હોવાની ફરિયાદ થઇ છે. વેપારીએ આ મામલે સેટેલાઈટ પોલીસ સ્ટેશનમાં ફરિયાદ નોંધાવતા પોલીસે ચાર વ્યક્તિ સામે ગુનો નોંધી તપાસ શરૂ કરી છે.
આંબાવાડીમાં રહેતા મહેન્દ્રભાઈ પટેલ વટવા જીઆઈડીસીમાં મશીનરી મેન્યુફેક્ચરિંગ કંપની ધરાવે છે. છેલ્લા પાંચ વર્ષથી લાયન્સ ક્લબમાં સભ્ય હોવાથી સભ્ય અને પ્રમુખ એવા મિહિર પરીખ સાથે પરિચય થયો હતો. મિહિર પોતે માર્કેટ, મ્યુચ્યુઅલ ફંડ, ટૂર્સ એન્ડ ટ્રાવેલ્સ તથા વીમા ક્ષેત્રની એમ.પી. ફિનકોર્પ સર્વિસિસ નામથી અલગ અલગ કંપની ધરાવતો હોવાનું જણાવતા હતા.
જે કંપનીઓમાં પત્ની ધારા, માતા ગીતાબેન અને હેમરાજસિંહ રાણા ભાગીદાર તરીકે રહીને અલગ અલગ ગ્રાહકો પાસેથી રોકાણ કરવા માટે પૈસા મેળવી તે નાણાં અન્ય કંપની મારફતે રોકાણ કરાવતા હોવાની વાત કરી હતી. ગ્રાહકોના નામથી જ ડીમેટ એકાઉન્ટ ખોલાવીને તેમના જ નામે શેર ખરીદી કરવામાં આવતા હોવાની વાત કરીને મહેન્દ્રભાઈને રોકાણ કરવાની લાલચ આપી હતી.
તેથી મહેન્દ્રભાઈ તેમના તથા તેમના પરિવારના સભ્યોના ખાતામાંથી કુલ શ્ ૫.૩૦ કરોડ ટ્રાન્સફર કર્યા હતા. જે બાદ મહેન્દ્રભાઈએ સારો નફો મળ્યો હોવાથી તે નાણાં વિડ્રો કરવાનું કહેતા મિહિર પરીખે શેરબજાર તેજીમાં હોવાનું કહીને નાણાં ન ઉપાડવા સલાહ આપી હતી. મિહિરે આપેલી એપ્લિશનમાં પણ ૫.૩૦ કરોડની સામે નફા સાથે ૬.૭૭ કરોડ રકમ બતાવવામાં આવી હતી. જ્યારે મહેન્દ્રભાઇએ પૈસા પરત માગ્યા ત્યારે મિહિરે વાયદાઓ કરી ફોન ઉપાડવાનું બંધ કરી દીધું હતું.
આરોપીએ કુલ રોકાણમાંથી ૨.૭૨ કરોડની રકમ આપી હતી પરંતુ અન્ય રકમ પરત ન આપતા મહેન્દ્રભાઇએ તપાસ કરતા તેમના નામે કોઈ ડીમેટ ખાતું ખોલવામાં આવ્યું જ ન હોવાની જાણ થઇ હતી.
તેમના તમામ સ્ટેટમેન્ટ પણ બોગસ હતા. આમ, મિહિર પરીખે ૫.૩૦ કરોડની રોકાણ કરેલી રકમમાંથી માત્ર ૨.૭૨ કરોડ પરત આપીને બાકીના નફા સાથેના કુલ શ્ ૪.૦૪ કરોડ પર ન આપતા મહેન્દ્રભાઈએ પોલીસ ફરિયાદ નોંધાવી છે. સેટેલાઈટ પોલીસે મિહિર પરીખ, પત્ની ધારા, માતા ગીતાબેન (તમામ રહે. સેટેલાઇટ) તથા હેમરાજસિંહ રાણા સામે ગુનો નોંધી તપાસ શરૂ કરી છે.SS1MS
