અરબી સમુદ્રમાં કોસ્ટગાર્ડનું સફળ ઓપરેશનઃ ૪ ઈરાની નાગરિકોની ધરપકડ; સ્મગલિંગ નેટવર્કના આંતરરાષ્ટ્રીય તાર શોધવા સુરક્ષા એજન્સીઓ સક્રિય
દ્વારકાના દરિયામાંથી કરોડોની વિદેશી સિગારેટ સાથે ઈરાની બોટ ઝડપાઈ
(એજન્સી)દ્વારકા, ગુજરાતના દરિયાકાંઠે નશીલા પદાર્થો અને પ્રતિબંધિત ચીજવસ્તુઓની ઘૂસણખોરી ડામવા માટે ભારતીય કોસ્ટગાર્ડે વધુ એક મોટી સફળતા હાંસલ કરી છે. દેવભૂમિ દ્વારકાથી આશરે ૧૧૫ નોટિકલ માઈલ દૂર અરબી સમુદ્રમાં હાથ ધરાયેલા સર્ચ ઓપરેશનમાં ‘અલ મુખ્તાર’ નામની ઈરાની બોટને કરોડોની કિંમતના વિદેશી સિગારેટના જથ્થા સાથે પકડી પાડવામાં આવી છે.
કોસ્ટગાર્ડને ચોક્કસ બાતમી મળી હતી કે એક શંકાસ્પદ જહાજ ભારતીય જળસીમામાં પ્રતિબંધિત વસ્તુઓ લઈને પ્રવેશી રહ્યું છે. આ બાતમીના આધારે મધદરિયે અત્યંત વ્યૂહાત્મક ઓપરેશન શરૂ કરાયું હતું. સુરક્ષા એજન્સીઓએ જ્યારે ‘અલ મુખ્તાર’ બોટને આંતરીને તેની તલાશી લીધી, ત્યારે જહાજના હોલ્ડમાં ખૂબ જ ચાલાકીપૂર્વક બનાવેલું એક ગુપ્ત ખાનું મળી આવ્યું હતું. આ ખાનામાંથી વિદેશી બ્રાન્ડની સિગારેટના ૨૦૦ જેટલા કાર્ટન (આશરે ૧ લાખ પેકેટ) મળી આવ્યા હતા.
પ્રાથમિક અંદાજ મુજબ, આંતરરાષ્ટ્રીય બજારમાં આ સિગારેટના જથ્થાની કિંમત ૨.૫ કરોડથી ૫ કરોડ રૂપિયા આંકવામાં આવી રહી છે. બોટમાં સવાર ૪ ઈરાની નાગરિકોને કસ્ટડીમાં લેવામાં આવ્યા છે. ઝડપાયેલી બોટ અને આરોપીઓને વધુ પૂછપરછ અને તપાસ માટે પોરબંદર જેટી પર લાવવામાં આવી રહ્યા છે.
આ સ્મગલિંગના કેસમાં હવે વિવિધ તપાસ એજન્સીઓ આ પાસાઓ પર તપાસ કરી રહી છે. આ જથ્થો કયા દેશમાંથી રવાના કરવામાં આવ્યો હતો?, ગુજરાતના દરિયાકાંઠે આ માલ કોને ડિલિવર કરવાનો હતો? ડ્ઢvજ શું આ રેકેટ પાછળ કોઈ મોટા આંતરરાષ્ટ્રીય સ્મગલિંગ માફિયાઓનો હાથ છે? તે દિશામાં વધુ તપાસ શરૂ કરવામમાં આવી છે
ગુજરાતનો દરિયાકાંઠો ફરી એકવાર સ્મગલિંગ માટે ઉપયોગમાં લેવાતો હોવાનું સામે આવતા સુરક્ષા એજન્સીઓએ દરિયાઈ પેટ્રોલીંગમાં ધરખમ વધારો કર્યો છે. ‘અલ મુખ્તાર’ બોટની પૂછપરછમાં અનેક મોટા ખુલાસા થવાની શક્યતા છે.
