MP Assets Analysis Gujarat 2026: દેશમાં વર્ષ ૨૦૧૪થી વડાપ્રધાન નરેન્દ્ર મોદીના નેતૃત્વમાં એનડીએ (NDA) સરકાર કાર્યરત છે. આ ૧૦ વર્ષના શાસનકાળ દરમિયાન લોકસભામાં રિપીટ થયેલા સાંસદોની આર્થિક સ્થિતિમાં કેવો બદલાવ આવ્યો છે, તેનો એક વિસ્તૃત અહેવાલ એસોસિએશન ફોર ડેમોક્રેટિક રિફોર્મ્સ (ADR) દ્વારા જાહેર કરવામાં આવ્યો છે. ચૂંટણી પંચ સમક્ષ રજૂ કરાયેલા સોગંદનામાના આધારે તૈયાર કરાયેલા આ રિપોર્ટમાં ગુજરાતના સાંસદોની સંપત્તિ અંગે ચોંકાવનારા આંકડા સામે આવ્યા છે.
ગુજરાતના સાંસદોની સંપત્તિમાં તોતિંગ વધારો
રિપોર્ટ અનુસાર, ૨૦૧૪ થી ૨૦૨૪ દરમિયાન ગુજરાતમાં રિપીટ થયેલા મોટાભાગના સાંસદોની મિલકતમાં કરોડોનો વધારો થયો છે. ખાસ કરીને જામનગરના સાંસદ પૂનમબેન માડમની સંપત્તિમાં સૌથી વધુ ઉછાળો જોવા મળ્યો છે. ૨૦૧૪માં તેમની સંપત્તિ રૂ. ૧૭.૪૩ કરોડ હતી, જે ૨૦૨૪માં વધીને રૂ. ૧૪૭.૭૦ કરોડે પહોંચી છે, એટલે કે ૧૦ વર્ષમાં રૂ. ૧૩૦ કરોડથી વધુનો વધારો થયો છે.
બીજી તરફ, કચ્છના સાંસદ વિનોદ ચાવડાની મિલકતમાં ટકાવારીની દ્રષ્ટિએ ૧૧૬૩%નો રેકોર્ડબ્રેક વધારો નોંધાયો છે. તેમની મિલકત રૂ. ૫૬ લાખથી વધીને રૂ. ૭ કરોડને વટાવી ગઈ છે.
સી.આર. પાટીલની સંપત્તિમાં આશ્ચર્યજનક ઘટાડો
ADR ના આ વિશ્લેષણમાં સૌથી આશ્ચર્યજનક બાબત એ છે કે કેન્દ્રીય મંત્રી અને ભાજપના દિગ્ગજ નેતા સી.આર. પાટીલની સંપત્તિમાં ૪૭ ટકાનો મોટો ઘટાડો નોંધાયો છે. વર્ષ ૨૦૧૪માં તેમની મિલકત રૂ. ૭૪ કરોડ હતી, જે ૨૦૨૪ના સોગંદનામા મુજબ ઘટીને રૂ. ૩૯ કરોડ થઈ ગઈ છે.
અન્ય સાંસદોની આર્થિક સ્થિતિ પર એક નજર
| સાંસદનું નામ (મતવિસ્તાર) | ૨૦૧૪ની સંપત્તિ | ૨૦૨૪ની સંપત્તિ | વધારાની ટકાવારી |
| પૂનમ માડમ (જામનગર) | ₹ ૧૭.૪૩ કરોડ | ₹ ૧૪૭.૭૦ કરોડ | – |
| વિનોદ ચાવડા (કચ્છ) | ₹ ૫૬ લાખ | ₹ ૭ કરોડ+ | ૧૧૬૩% |
| પ્રભુ વસાવા (બારડોલી) | ₹ ૧ કરોડ+ | ₹ ૪.૭૦ કરોડ | ૧૯૫% |
| જસવંતસિંહ ભાભોર (દાહોદ) | ₹ ૧.૯૬ કરોડ | ₹ ૪.૮૪ કરોડ | ૧૪૬% |
| રાજેશ ચુડાસમા (જૂનાગઢ) | ₹ ૭૪ લાખ | ₹ ૩.૩૪ કરોડ | ૩૪૯% |
| દેવુસિંહ ચૌહાણ (ખેડા) | ₹ ૯૪ લાખ | ₹ ૩.૪૯ કરોડ | ૨૭૧% |
રાષ્ટ્રીય સ્તરની સ્થિતિ
સમગ્ર દેશની વાત કરીએ તો, ૧૦ વર્ષમાં રિપીટ થયેલા ૧૦૨ સાંસદોની સરેરાશ મિલકત રૂ. ૧૫.૭૬ કરોડથી વધીને રૂ. ૩૩.૧૩ કરોડ થઈ છે, જે સરેરાશ ૧૧૦ ટકાનો વધારો દર્શાવે છે. ADR દ્વારા આ અહેવાલ મતદારોને તેમના પ્રતિનિધિઓની આર્થિક પારદર્શિતા વિશે માહિતગાર કરવાના હેતુથી પ્રસિદ્ધ કરવામાં આવ્યો છે.
