મુંબઈઃ નેશનલ કંપની લો ટ્રિબ્યુનલ (NCLT) એ ગુરુવારે મીડિયા અને મનોરંજન કંપની Zee Entertainment Enterprises Limited અને Culver Max Entertainment (અગાઉ સોની પિક્ચર્સ નેટવર્ક્સ ઇન્ડિયા) ના મર્જરને મંજૂરી આપી હતી. NCLTની મુંબઈ બેન્ચે બે કંપનીઓના મર્જરને મંજૂરી આપી છે, જેનાથી $10 બિલિયન મીડિયા સમૂહ અસ્તિત્વમાં આવવાનો માર્ગ મોકળો થયો છે. તે તેના ક્ષેત્રમાં દેશની સૌથી મોટી કંપની હશે. એચવી સુબ્બા રાવ અને મધુ સિન્હાની બેન્ચે આ વિલીનીકરણ અંગે દાખલ કરાયેલા તમામ વાંધાઓને પણ ફગાવી દીધા હતા. એનસીએલટીએ 11 જુલાઈના રોજ અનેક ધિરાણકર્તાઓના વાંધાઓ સાંભળ્યા બાદ મર્જર પર પોતાનો આદેશ અનામત રાખ્યો હતો.
ટ્રિબ્યુનલે એક્સિસ ફાઇનાન્સ, જેસી ફ્લાવર એસેટ રિકન્સ્ટ્રક્શન કંપની, IDBI બેન્ક, IMAX કોર્પ અને IDBI ટ્રસ્ટીશિપ જેવા ધિરાણકર્તાઓની દલીલો સાંભળી હતી. ડિસેમ્બર 2021 માં, ઝી એન્ટરટેઈનમેન્ટ અને સોની પિક્ચર્સ તેમના વ્યવસાયોને મર્જ કરવા સંમત થયા હતા. બંને મીડિયા જૂથોએ નેશનલ સ્ટોક એક્સચેન્જ (એનએસઈ), બીએસઈ અને કોમ્પિટિશન કમિશન ઓફ ઈન્ડિયા અને સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) જેવા નિયમનકારો પાસેથી પરવાનગી મેળવ્યા બાદ મર્જરને મંજૂરી આપવા માટે ટ્રિબ્યુનલનો સંપર્ક કર્યો હતો. જોકે, ઝી એન્ટરટેઈનમેન્ટની કેટલાક ધિરાણકર્તાઓએ વાંધો ઉઠાવ્યા બાદ પ્રક્રિયા અટકી પડી હતી. એસ્સેલ જૂથના કેટલાક લેણદારોએ મર્જરની યોજનામાં દાખલ કરાયેલી બિન-સ્પર્ધાત્મક કલમો સામે વાંધો ઉઠાવ્યો હતો.
NSE અને BSE એ NCLTની મુંબઈ બેંચને એસ્સેલ ગ્રૂપની કંપનીઓના પ્રમોટરો સામે ભંડોળના કથિત ડાયવર્ઝન માટે આપવામાં આવેલા આદેશો વિશે જાણ કરી છે. આમાં પુનિત ગોએન્કા સામે સિક્યોરિટીઝ એપેલેટ ટ્રિબ્યુનલ (SAT)ના આદેશનો પણ સમાવેશ થાય છે, જે તેમને કોઈપણ લિસ્ટેડ કંપનીમાં ડિરેક્ટરશિપ રાખવા પર પ્રતિબંધ મૂકે છે. SAT એ ઝી એન્ટરટેઈનમેન્ટના પ્રમોટર્સ સુભાષ ચંદ્રા અને ગોએન્કા બંનેને એક વર્ષ માટે લિસ્ટેડ કંપનીઓમાં ડિરેક્ટરશિપ રાખવા પર પ્રતિબંધ મૂકતા સેબીના વચગાળાના આદેશને યથાવત રાખ્યો છે. મર્જરની યોજના સામે વાંધો ઉઠાવનાર પક્ષોએ આ દરખાસ્ત મંજૂર કરવી જોઈએ નહીં કારણ કે ગોએન્કાનું નામ કંપનીના મેનેજિંગ ડિરેક્ટર તરીકે નિશ્ચિત છે. યોજના હેઠળ નવી કંપનીની રચના કરવામાં આવશે.