નિફટી ફ્યુચર ૨૫૦૦૮ પોઈન્ટ ઉપર તેજી તરફી ધ્યાન..!!!

કરન્સી માર્કેટની વાત કરીએ તો, યુએસ પ્રમુખ ડોનાલ્ડ ટ્રમ્પે ૧ ઓગસ્ટથી યુરોપિયન યુનિયન અને મેક્સિકોથી આયાત પર ટેરિફ લાદવાની ધમકી આપ્યા બાદ સોમવારે અમેરિકન ચલણમાં મજબૂતી અને ભારતીય મૂડી બજારમાંથી વિદેશી ભંડોળના પ્રવાહ વચ્ચે ભારતીય રૂપિયો અમેરિકન ડોલર સામે નબળો પડ્યો હતો, જયારે જોરદાર ઉનાળુ માંગને પરિણામે ક્રુડ ઓઈલની વૈશ્વિક બજાર જણાય છે તેના કરતા વધુ મજબૂત હોવાના ઈન્ટરનેશનલ એનર્જી એજન્સીના નિવેદન બાદ વૈશ્વિક ક્રુડ ઓઈલના ભાવમાં અંદાજીત ૨% જેટલો વધારો જોવા મળ્યો હતો.

સેક્ટર મુવમેન્ટ… બીએસઇ પર મીડકેપ ઈન્ડેક્સ ૦.૬૭% અને સ્મોલકેપ ઈન્ડેક્સ ૦.૫૭% વધીને બંધ રહ્યા હતા. વિવિધ સેક્ટરલ ઈન્ડાયસીસની વાત કરીએ તો બીએસઈ પર માત્ર ફોકસ્ડ આઈટી, આઈટી, ટેક, ઈન્ડસ્ટ્રિયલ્સ અને કેપિટલ ગુડ્સ ઘટ્યા હતા, જયારે અન્ય બીજા તમામ સેક્ટરલ ઈન્ડાયસીસ ઉછાળા સાથે બંધ રહ્યા હતા.

બીએસઈમાં કુલ ટ્રેડીંગ થયેલી ૪૩૪૦ સ્ક્રિપોમાંથી ઘટનારની સંખ્યા ૨૧૩૭ અને વધનારની સંખ્યા ૨૦૫૪ રહી હતી, ૧૪૯ શેરના ભાવમાં કોઈ ફેરબદલ જોવાયો ન હતો. જ્યારે ૧૧ શેરોમાં ઓનલી સેલરની મંદીની નીચલી સર્કિટ સામે ૩ શેરોમાં ઓનલી બાયરની તેજીની ઉપલી સર્કિટ રહી હતી.

બીએસઈ સેન્સેક્સ સમાવિષ્ટ શેરોમાં મુખ્યત્વે ઈટર્નલ ૨.૮૩%, ટાઈટન ઈન્ડસ્ટ્રીઝ ૧.૨૩%, સન ફાર્મા ૦.૫૪%, આઈટીસી લિ. ૦.૫૪%, મહિન્દ્ર એન્ડ મહિન્દ્ર ૦.૫૨%, ટાટા સ્ટીલ ૦.૩૧%, અદાણી પોર્ટ્સ ૦.૨૩%, સ્ટેટ બેન્ક ૦.૧૦%, આઈસીઆઈસીઆઈ બેન્ક ૦.૦૩% અને ભારતી એરટેલ ૦.૦૩% વધ્યા હતા, જ્યારે એશિયન પેઈન્ટ ૧.૫૮%, ટેક મહિન્દ્ર ૧.૫૫%, બજાજ ફાઈનાન્સ ૧.૫૪%, ઈન્ફોસિસ ૧.૫૩%, એચસીએલ ટેકનોલોજી ૧.૪૧%, ટીસીએસ લિ. ૧.૨૯%, લાર્સન લિ. ૧.૨૫%, ટાટા મોટર્સ ૧.૦૪% અને બજાજ ફિનસર્વ ૦.૭૭% ઘટ્યા હતા.

ઈન્ડેક્સ બેઝડ સેન્સેક્સ, નિફટી ફ્યુચરમાં ઘટાડા સામે મીડકેપ, સ્મોલકેપ શેરોમાં લેવાલીએ રોકાણકારોની સંપતિ બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન ૦.૯૫ લાખ કરોડ વધીને ૪૫૭.૬૪ લાખ કરોડ રહ્યું હતું. એસએન્ડપી બીએસઈ સેન્સેક્સની ૩૦ કંપનીઓમાંથી ૧૦ કંપનીઓ વધી અને ૨૦ કંપનીઓ ઘટી હતી.

બજારની ભાવિ દિશા….

મિત્રો, વર્તમાન વર્ષના જૂનમાં દેશમાં ૨૫ લાખ નવા ડીમેટ ખાતા ખોલાવાયા છે જે જાન્યુઆરીથી અત્યાર સુધીમાં સૌથી મોટો ઉમેરો છે. ૨૫ લાખ નવા ડીમેટ ખાતા સાથે ડીમેટ ખાતાની એકંદર સંખ્યા વધી ૨૦ કરોડની નજીક પહોંચી ગયાનું પ્રાપ્ત ડેટા પરથી જણાય છે. જૂન માસમાં શેરબજારમાં ફરી આવેલી રેલીને કારણે રોકાણકારોનો વિશ્વાસ વધ્યો છે. જૂન ૨૦૨૪માં કુલ ૪૫ લાખ નવા ડીમેટ ખાતા ઉમેરાયા હતા. સપ્ટેમ્બર ૨૦૨૪માં આ આંક ૪૮ લાખ રહ્યો હતો પરંતુ ત્યાર બાદ વૈશ્વિક ભૌગોલિક રાજકીય તણાવને લઈને ભારત સહિત વિશ્વભરના શેરબજારોમાં સ્થિતિ ડામાડોળ થતા રોકાણકારો ખાસ કરીને રિટેલ રોકાણકારોનો વિશ્વાસ કથળી ગયો હતો જેને પરિણામે નવા ડીમેટ ખાતામાં ઉમેરો મંદ પડયો હતો.

જુન ૨૦૨૪માં ડીમેટ ખાતાની કુલ સંખ્યા ૧૬.૨૦ કરોડ હતી જે વર્તમાન વર્ષના જૂનના અંતે વધી ૧૯.૯૦ કરોડ પર પહોંચી ગયાનું પ્રાપ્ત ડેટા પરથી જણાય છે. માર્ચ-એપ્રિલની સરખામણીએ જૂનમાં શેરબજારની મજબૂત કામગીરીને પગલે રોકાણકારો ફરી શેરબજાર તરફ વળ્યા છે. માર્ચમાં શૂન્ય અને એપ્રિલમાં એક લિસ્ટિંગ બાદ જૂનમાં આઠ જેટલી કંપનીઓએ બજારમાંથી રૂ.૧૭૫૦૦ કરોડથી વધુ રકમ ઊભી કરી હતી. વિશ્વના અન્ય ઊભરતા દેશોની સરખામણીએ ભારતના અર્થતંત્રની સ્થિતિ મજબૂત જોવા મળી રહી છે. ઉપરાંત સારા વરસાદના કારણે કૃષિ ક્ષેત્રે ગ્રોથ નોંધાવાના સંકેત સાથે ગ્રામીણ માંગ પણ મજબૂત રહેવાની શક્યતા છે. ત્યારે આગામી દિવસોમાં ભારતીય શેરબજાર પર તેની પોઝીટીવ અસર જોવા મળી શકે છે.

ડિસ્ક્લેમર / પોલીસી / શરતો www.nikhilbhatt.in ને આધીન…!!!

The securities quoted are for illustration only and are not recommendatory. Investment in securities market are subject to market risks. Read and agree Disclaimer and related all the documents carefully before investing, mentioned on www.nikhilbhatt.in