કોન્ટ્રાકટરોની જવાબદારી નકકી કરવા એસઓપી બનાવવા આદેશ
ઓક્સિજન પાર્ક અને સુંદરવનના ઝાડ સુકાઈ ગયા. અમદાવાદના બાગ બગીચાઓની માવજતમાં તંત્ર નિષ્ફળ સાબિત થઈ રહયું છે.
(પ્રતિનિધિ) અમદાવાદ, અમદાવાદ મ્યુનિ. કોર્પોરેશન દ્વારા પીપીપી ધોરણે સ્મશાન, હોલ કે બગીચા આપવામાં આવે છે ત્યારબાદ તેની માવજત થાય છે કે કેમ એની કોઈ જ કાળજી લેવામાં આવતી નથી.
આ ઉપરાંત આઉટ સો‹સગમાં પણ લાલિયાવાડી ચાલી રહી છે મ્યુનિ. કોર્પોરેશનની ચૂંટણી આવી રહી હોવાથી અધિકારીઓને નાગરિકોની ફરિયાદનો ઝડપથી નિકાલ કરવા તાકીદ કરી હતી તેમજ મીડિયામાં આવતા નેગેટિવ ન્યુઝને લઈને કમિશનરે અધિકારીઓને આડા હાથે લીધા હતાં.
મ્યુનિ. કમિશનરના અધ્યક્ષસ્થાને મળતી રીવ્યુ મીટીંગમાં છેલ્લા બે સપ્તાહથી મુખ્ય મુદ્દો ‘નો નેગેટિવ ન્યુઝ’ રહયો છે. મ્યુનિ. કોર્પોરેશનની ચૂંટણીને ધ્યાનમાં લઈ કમિશનરે આ બાબતે અધિકારીઓને ખાસ તાકીદ કરી હતી. શહેરના પૂર્વ અને દક્ષિણ ઝોનમાં અધિકારીઓની નિષ્ક્રિયતાના કારણે ફરિયાદો વધી રહી છે અને આ બે ઝોનના જ નેગેટિવ ન્યુઝ મીડિયામાં આવી રહયા છે તે બાબતને ધ્યાનમાં લઈ બંને ઝોનના ડેપ્યુટી કમિશનરોને કમિશનરે આડા હાથે લીધા હતાં
આ ઉપરાંત દક્ષિણ ઝોનમાં પાછલા વર્ષની જેમ આ વર્ષે પણ પાણીજન્ય રોગચાળો વકરી રહયો છે. ઝોનના બહેરામપુરા વિસ્તારમાં ટાઈફોઈડ અને કોલેરાના કેસ વધ્યા છે તેમજ ગયા સપ્તાહે આ વિસ્તારમાં જ ફુડ પોઈઝનીંગના કેસ પણ બન્યા હતા તેમ છતાં તંત્ર હજી સક્રિય બન્યુ નથી તે બાબતની પણ ગંભીર નોંધ લેવામાં આવી હતી.
શહેરના હાટકેશ્વર બ્રીજના ડીમોલેશનનું કામ પૂર્ણ થઈ ગયું છે પરંતુ કોન્ટ્રાકટર દ્વારા પાણીની પાઈપો તોડી પાડવામાં આવી છે તેમજ તેને રીપેર પણ કરવામાં આવી નથી કમિશનરે આ બાબતે પણ જવાબદાર અધિકારીનો ઉધડો લીધો હતો તથા કોન્ટ્રાકટરો તેમને ફાવે તેમ કામ કરી શકે નહી આ માટે યોગ્ય માર્ગદર્શિકા તૈયાર કરવા સુચના આપી હતી.
શહેરના બાગ બગીચાઓની માવજતમાં તંત્ર નિષ્ફળ સાબિત થઈ રહયું છે. ઓક્સિજન પાર્ક અને સુંદરવનના ઝાડ સુકાઈ ગયા છે. બગીચા વિભાગના ઉચ્ચ અધિકારીઓ આ મામલે જવાબ આપી શક્યા ન હતાં. બજેટમાં જાહેર કર્યા મુજબ ૧પ ફાયર સ્ટેશન તૈયાર કરવા જમીન ફાળવણીની પ્રક્રિયા પૂર્ણ થઈ ગઈ છે તે બાબતે કમિશનરે સંતોષ વ્યકત કર્યો હતો.
