ઉનાના સીમરમાં આડા સંબંધની શંકાએ પતિએ પત્નીની દસ્તાના ઘા ઝીંકી હત્યા કરી

વેરાવળ,ગીર સોમનાથ જિલ્લાના ઉના તાલુકાના સીમર ગામે વાડી વિસ્તારમાં દંપતી વચ્ચે થયેલા ઝઘડાએ લોહીયાળ વળાંક લીધો છે. આવેશમાં આવી ગયેલા પતિએ પત્નીના માથાના ભાગે દસ્તાના જીવલેણ ઘા ઝીંકી તેની કરપીણ હત્યા નિપજાવી હતી. આ ઘટનાની જાણ થતા જ સ્થાનિક પોલીસ કાફલો ઘટનાસ્થળે દોડી ગયો હતો અને ગણતરીના કલાકોમાં ફરાર આરોપી પતિની ધરપકડ કરી કાયદેસરની કાર્યવાહી હાથ ધરી છે.

પોલીસ સૂત્રોના જણાવ્યા પ્રમાણે, સીમર ગામના વાડી વિસ્તારમાં રહેતા જગદીશ ઉર્ફે જગા ડાભી અને તેની પત્ની લક્ષ્મીબેન ડાભી (ઉંમર ૪૫ વર્ષ) વચ્ચે બપોરના સમયે કોઈ બાબતે ઉગ્ર બોલાચાલી થઈ હતી. આ બોલાચાલી દરમિયાન ઉશ્કેરાયેલા જગદીશે ઘરમાં રહેલા દસ્તા વડે લક્ષ્મીબેન પર હુમલો કર્યાે હતો. લોહીલુહાણ હાલતમાં લક્ષ્મીબેનને તાત્કાલિક સીમર પ્રાથમિક આરોગ્ય કેન્દ્ર ખાતે ખસેડવામાં આવ્યા હતા, જ્યાં ફરજ પરના તબીબે તેમને મૃત જાહેર કર્યા હતા. માતાના મોતના સમાચાર મળતા જ પુત્રો કેતન અને દિનેશ હોસ્પિટલ દોડી આવ્યા હતા અને માતાના મૃતદેહને જોઈ હૈયાફાટ રુદન કર્યું હતું.

હત્યાના કારણ અંગે પરિવારના સભ્યોમાં વિરોધાભાસ જોવા મળી રહ્યો છે. આરોપીના ભાઈ પરબત ડાભીએ મીડિયાને જણાવ્યું હતું કે, મારા ભાઈ અને ભાભી વચ્ચે અવારનવાર માથાકૂટ થતી હતી. મારા ભાભીને કોઈની સાથે આડા સંબંધ હોવાની શંકાના આધારે ભાઈએ આ પગલું ભર્યું હોવાની શક્યતા છે. મારો ભાઈ પહેલા દારૂ નહોતો પીતો, પણ આ કારણોસર તે દારૂ પણ પીવા લાગ્યો હતો.

બીજી તરફ, મૃતક મહિલાના પુત્ર કેતને આ આક્ષેપોને ફગાવતા મીડિયાને જણાવ્યું હતું કે, મમ્મી અને પપ્પા વચ્ચે છેલ્લા થોડા સમયથી ઘર બાબતે ઝઘડો થતો હતો, પરંતુ મમ્મીને કોઈ સાથે ખરાબ સંબંધ નહોતા. મારા પપ્પાને મગજની બીમારી છે અને અગાઉ તેમની દવા ચાલતી હતી, જે હાલમાં બંધ હતી.ss1