Vadodara Range Rover Crash: વડોદરામાં ફરી એકવાર રફ્તારનો કહેર જોવા મળ્યો છે. શહેરના રાવપુરા વિસ્તારમાં એક પૂરપાટ ઝડપે આવતી રેન્જ રોવર કાર ટ્રાફિક સિગ્નલ સાથે અથડાઈ હતી, જેના કારણે ગાડીના આગળના ભાગના ફુરચા ઉડી ગયા હતા અને આસપાસના લોકો ફફડી ઉઠ્યા હતા. જાણવા મળ્યું છે કે કારની સ્પીડ ખૂબ જ વધારે હતી. આ ઘટનાએ ફરી એકવાર શહેરમાં ઓવરસ્પીડિંગ પરના નિયંત્રણ સામે સવાલો ઊભા કર્યા છે. ઉલ્લેખનીય છે કે, વડોદરામાં જ એમ.એસ. યુનિવર્સિટીના લો સ્ટુડન્ટ રક્ષિત ચૌરસિયાએ અનેક વાહનોને ટક્કર મારી હતી, જેમાં સાત લોકો ઘાયલ થયા હતા અને એક મહિલાનું મોત નીપજ્યું હતું. આ ઘટના ગયા વર્ષે ૧૩ માર્ચના રોજ બની હતી.
ડીજીપીના પ્રવાસ પહેલા જ બની ઘટના
પોલીસના જણાવ્યા અનુસાર, આ ઘટના શુક્રવારે મોડી રાત્રે બની હતી. પોલીસ ગાડીની વિગતો મેળવીને તપાસ કરી રહી છે. શનિવારે શહેરમાં ડીજીપી ડૉ. કે.એલ.એન. રાવના પ્રવાસ પહેલા બનેલી આ ઘટનામાં સદનસીબે કોઈ વ્યક્તિ અડફેટે આવી નહોતી. જોકે, ટક્કર એટલી જોરદાર હતી કે ગાડીના સ્પેરપાર્ટસ અલગ-અલગ થઈ ગયા હતા. એક ટાયર ફાટીને ઉડી ગયું હતું અને એરબેગ્સ તરત જ ખુલી ગઈ હતી. પ્રત્યક્ષદર્શીઓના જણાવ્યા મુજબ, SUV જુબેલીબાગથી રાવપુરા તરફ જઈ રહી હતી ત્યારે હાઈ સ્પીડના કારણે ડ્રાઈવરે સ્ટેયરીંગ પરનો કાબૂ ગુમાવ્યો હતો. ગાડી રોડ ડિવાઈડર પર ચઢી ગઈ અને સીધી ટ્રાફિક સિગ્નલના થાંભલા સાથે અથડાઈ હતી.
ટ્રાફિક સિગ્નલ જમીનદોસ્ત થયું
ટક્કરને કારણે સિગ્નલનો થાંભલો ઉખડી ગયો અને નજીકના ઈલેક્ટ્રિકલ કંટ્રોલ બોક્સને પણ નુકસાન થયું હતું. ઘટનાની જાણ થતા જ રાવપુરા પોલીસ સ્થળ પર પહોંચી હતી. પોલીસે બેદરકારીપૂર્વક અને પૂરપાટ ઝડપે ગાડી ચલાવવા તેમજ સરકારી મિલકતને નુકસાન પહોંચાડવાનો ગુનો નોંધ્યો છે. અધિકારીઓએ પુષ્ટિ કરી છે કે ડ્રાઈવર અકસ્માત બાદ તરત જ ક્ષતિગ્રસ્ત ગાડી છોડીને ફરાર થઈ ગયો હતો. પ્રાથમિક તપાસમાં પોલીસને જાણવા મળ્યું છે કે આ રેન્જ રોવર લગભગ એક વર્ષ પહેલા વેચવામાં આવી હતી. અધિકારીઓ હવે માલિકીના રેકોર્ડ ચકાસી રહ્યા છે અને ડ્રાઈવરની ઓળખ કરવા તેમજ તેને પકડવા માટે નજીકના સર્કલના CCTV ફૂટેજની તપાસ કરી રહ્યા છે.
