ગાંધીનગરઃ દિવાળી નજીક આવતા જ પાકિસ્તાનની જેલમાં બંધ ભારતીય માછીમારોને પણ સારા સમાચાર મળ્યા છે. સૌરાષ્ટ્રના માછીમારો લાંબા સમયથી તેમના પરિવારના સભ્યની રાહ જોઈ રહ્યા હતા જેનો આજે અંત આવ્યો છે. પાકિસ્તાનની જેલમાં બંધ સૌરાષ્ટ્રના 80 માછીમારોને મુક્ત કરવાનો નિર્ણય લેવાયો છે. તેમના પરિવારજનોએ આજે રાહતનો શ્વાસ લીધો છે. જેના કારણે ગુજરાતના આ 80 માછીમારોના પરિવારો માટે દિવાળી ખુશનુમા બની છે.
દિવાળીનો તહેવાર નજીક આવતા જ પાકિસ્તાનમાં બંધક બનેલા ગુજરાતના 80 જેટલા માછીમારોને મુક્ત કરવામાં આવ્યા છે. જેના કારણે આ 80 બંધક માછીમારોની દિવાળી પૂર્ણ થઈ ગઈ છે. બંધક માછીમારોના પરિવારો લાંબા સમયથી આ નિર્ણયની રાહ જોઈ રહ્યા હતા.
પાકિસ્તાને પાકિસ્તાનની જેલમાં બંધ 80 ગુજરાતી માછીમારોને મુક્ત કર્યા છે. હવે આ માછીમારો 10મી નવેમ્બરે વાઘા બોર્ડર પહોંચશે. જ્યાંથી તમામને ટ્રેન દ્વારા વેરાવળ લાવવામાં આવશે. જો કે હજુ પણ 143 ભારતીય માછીમારો પાકિસ્તાનની જેલમાં કેદ છે. આ તમામ 80 ભારતીય માછીમારો 2021થી પાકિસ્તાનની જેલમાં કેદ હતા.
મુક્ત કરાયેલા માછીમારોમાં પાકિસ્તાને ગીર સોમનાથ જિલ્લાના 59, દેવભૂમિ દ્વારકાના 15, જામનગરના 01, અમરેલીના 02, દીવમાંથી 03 માછીમારોને મુક્ત કર્યા છે. તાજેતરમાં 9 ઓક્ટોબરના રોજ પાકિસ્તાનની કરાચી જેલમાં બંધ કોડીનાર તાલુકાના દુદાણા ગામના માછીમાર ભૂપત વાલાનું બીમારીના કારણે મૃત્યુ થયું હતું. તેમના મૃતદેહને દુદાણા લાવવામાં આવ્યો હતો જ્યાં અંતિમ સંસ્કાર કરવામાં આવ્યા હતા.