સિદ્ધપુર શહેર સહિત જિલ્લામાં મુશળધાર વરસાદ વરસ્યો હતો. પોણા કલાકમાં એક ઇંચ જેટલો વરસાદ પડતાં શહેરના સિદ્ધપુર દેથલી ચાર રસ્તા અને રેલવે અંડરપાસ સહિતના વિવિધ વિસ્તારોમાં પાણી ભરાયા હતા. જેના કારણે રાહદારીઓ અને વાહન ચાલકોને ભારે હાલાકીનો સામનો કરવો પડ્યો હતો. પાટણ શહેરમાં બે દિવસ પહેલા વીજળીના કડાકા સાથે જોરદાર પવન ફૂંકાયો હતો ત્યારબાદ બે થી અઢી ઈંચ વરસાદ પડ્યો હતો. સરસ્વતી તાલુકામાં ત્રણ ઈંચ વરસાદ નોંધાયો હતો. બે કલાકમાં આટલો વરસાદ વરસ્યો હતો, જ્યારે જિલ્લાના અન્ય તાલુકાઓમાં પણ એકથી અઢી ઈંચ વરસાદ નોંધાયો હતો, ત્યારબાદ બે દિવસના વિરામ બાદ પાટણ શહેર સહિત સમગ્ર પંથકમાં વાતાવરણમાં પલટો આવ્યો હતો અને જોરદાર પવન ફૂંકાવા લાગ્યો હતો. આકાશમાં કાળાડિબાંગ વાદળો સાથે તેમજ વરસાદી ઝાપટાં પડતાં વાતાવરણ ઠંડુગાર બની ગયું હતું. છેલ્લા એક-બે દિવસથી કાળઝાળ ગરમીથી પરેશાન લોકોએ વરસાદી ઝાપટાં પડતાં ગરમીમાંથી રાહત અનુભવી હતી.