હવામાન વિભાગની આગાહી વચ્ચે આજે ફરી હવામાનમાં પલટો આવ્યો છે. ત્યારે આકાશમાં કાળાડિબાંગ વાદળો સાથે ધીમીધારે કમોસમી વરસાદ શરૂ થયો છે. સુપ્રસિદ્ધ યાત્રાધામ અંબાજી, દાંતા અને આસપાસના વિસ્તારોમાં આજે સવારથી હવામાનમાં પલટો જોવા મળ્યો હતો. આ પછી ફરી એકવાર ભારે પવન અને આકાશમાં કાળા વાદળો સાથે કમોસમી વરસાદ શરૂ થયો છે.
દાંતા તાલુકામાં 28/5/2023 ના રોજ વાવાઝોડા સાથે ભારે વરસાદ થયો હતો. જેના કારણે ખેડૂતો અને વેપારીઓને પણ નુકશાની વેઠવી પડી હતી. બીજી તરફ આજે ફરી હવામાન વિભાગની આગાહી વચ્ચે યાત્રાધામ અંબાજી, દાંતા અને આસપાસના વિસ્તારોમાં કમોસમી વરસાદ શરૂ થયો છે. સવારથી જ આકાશમાં કાળાડિબાંગ વાદળો છવાયા હતા અને ફરી એકવાર ધીમીધારે વરસાદ શરૂ થયો હતો. આવી સ્થિતિમાં સતત કમોસમી વરસાદના કારણે ખેડૂતોના પાકને ભારે નુકસાન થયું છે. ત્યારે આ કમોસમી વરસાદથી ખેડૂતો ફરી પરેશાન થયા છે.