25 થી 30 જૂન દરમિયાન રાજ્યના કેટલાક ભાગોમાં ભારે વરસાદની શક્યતા, મેઘરાજા કરશે તોફાની બેટિંગ
અમદાવાદઃ
રાજ્યમાં હવામાન વિભાગે રાજ્યમાં ભારે વરસાદની આગાહી કરી હતી. શનિવારે રાજ્યના કેટલાક વિસ્તારોમાં મેઘરાજા મુનમુકીને વરસ્યા હતા, જેમાં રાજ્યના કુલ 59 તાલુકાઓમાં વરસાદ નોંધાયો હતો. પંચમહાલના જાંબુઘોડામા સૌથી વધુ વરસાદ નોંધાયો હતો.
આગામી 5 દિવસ ભારે વરસાદની આગાહી કરવામાં આવી છે. ગુજરાતમાં ચોમાસાના આગમનની આતુરતાપૂર્વક રાહ જોવાઈ રહી છે. દરમિયાન હવામાનશાસ્ત્રી અંબાલાલ પટેલે વરસાદને લઈને મોટી આગાહી કરી છે. જે મુજબ આવતીકાલથી ગુજરાતમાં ભારે વરસાદની સંભાવના છે.
અંબાલાલ પટેલે જણાવ્યું હતું કે બંગાળની ખાડીમાં વરસાદને કારણે ગુજરાતમાં ભારેથી અતિ ભારે વરસાદ પડશે. 25 થી 30 જૂન દરમિયાન રાજ્યના કેટલાક ભાગોમાં ભારેથી અતિભારે વરસાદની સંભાવના છે. મધ્ય ગુજરાત, ઉત્તર-મધ્ય, પૂર્વ ગુજરાતના ભાગોમાં વરસાદની સંભાવના છે. આહવા, ડાંગ અને વલસાડના ભાગોમાં વરસાદ પડી શકે છે. સૌરાષ્ટ્ર અને કચ્છના કેટલાક ભાગોમાં પણ 5મી જુલાઈ સુધી વરસાદ પડવાની શક્યતા છે. જે નિયમિત ચોમાસાનો વરસાદ હશે.
આ સાથે જ હવામાન વિભાગે આગામી 5 દિવસ સુધી વરસાદની સંભાવના વ્યક્ત કરી છે. 27 જૂને વલસાડમાં ભારે વરસાદની સંભાવના છે. ચોમાસાની ગતિવિધિઓ સક્રિય બની છે. 28 થી 30 જૂન દરમિયાન ભારેથી અતિ ભારે વરસાદની સંભાવના છે. જૂનના અંતમાં ભારે વરસાદ પડશે. અમદાવાદ અને મહેસાણામાં ભારેથી અતિભારે વરસાદની સંભાવના છે.