અમદાવાદઃ ગુજરાતના મુખ્યમંત્રી ભૂપેન્દ્ર પટેલના પુત્ર અનુજને ગઈકાલે બ્રેઈન સ્ટ્રોક આવ્યો હતો. અમદાવાદની કેડી હોસ્પિટલમાં સારવાર બાદ તેને વધુ સારવાર માટે મુંબઈની હિન્દુજા હોસ્પિટલમાં ખસેડવામાં આવ્યો છે. મુખ્યમંત્રી ભૂપેન્દ્ર પટેલ પણ મુંબઈ પહોંચી ગયા છે અને તેમના પુત્રની તબિયત નાદુરસ્ત હોવાને કારણે તેઓ જામનગરમાં ગુજરાત ગૌરવ દિવસની ઉજવણીમાં હાજરી આપી ન હતી.
રવિવારે બપોરે મુખ્યમંત્રી ભૂપેન્દ્ર પટેલના પુત્ર અનુજ પટેલને હાઈ બ્લડ પ્રેશર બાદ બ્રેઈન સ્ટ્રોક આવ્યો હતો. જે બાદ બપોરે 2.45 કલાકે તેને શહેરની કેડી હોસ્પિટલમાં સારવાર માટે દાખલ કરવામાં આવ્યો હતો. તેને તાત્કાલિક સારવાર માટે કેડી હોસ્પિટલમાં લઈ જવામાં આવ્યો હતો. બપોરે લગભગ 2 કલાક સુધી અનુજ પટેલનું ઓપરેશન ચાલ્યું હતું. આ દરમિયાન મુખ્યમંત્રી તેમના પરિવાર સાથે હોસ્પિટલમાં હાજર રહ્યા હતા.
નોંધનીય છે કે, મુખ્યમંત્રીના પુત્ર અનુજ પટેલે પણ પિતાની જેમ એન્જિનિયરિંગમાં ડિપ્લોમા કર્યું છે. જો કે હાલ તેઓ કન્સ્ટ્રક્શનના વ્યવસાય સાથે સંકળાયેલા છે.