અમદાવાદઃ અમદાવાદમાં ભારતનું પ્રથમ બુલેટ ટ્રેન સ્ટેશન તૈયાર થઈ ગયું છે. રેલવે મંત્રી અશ્વિની વૈષ્ણવે ગુરુવારે સાબરમતીમાં પૂર્ણ થયેલ બુલેટ ટ્રેન ટર્મિનલની ભવ્યતા દર્શાવતો આ વીડિયો શેર કર્યો હતો. જોકે, અમદાવાદમાં સાબરમતી ખાતે મલ્ટિમોડલ ટ્રાન્સપોર્ટ હબ બનાવવામાં આવ્યું છે. જેમાં બુલેટ ટ્રેન સ્ટેશનની સાથે અન્ય મેટ્રો અને ટ્રેન બસની સુવિધા પણ ઉપલબ્ધ થશે. રેલવે મંત્રી દ્વારા શેર કરવામાં આવેલો આ વીડિયો સોશિયલ મીડિયા પર વાયરલ થઈ રહ્યો છે.
દેશની પ્રથમ બુલેટ ટ્રેન મુંબઈ અને અમદાવાદ વચ્ચે 508 કિલોમીટરનું અંતર કાપશે. આ અંતર માત્ર 2 કલાકમાં કાપવામાં આવશે. આ રૂટ પર 12 રેલવે સ્ટેશન બનાવવામાં આવશે. મુંબઈ-અમદાવાદ વચ્ચે જે બુલેટ ટ્રેનનો રૂટ બનાવવામાં આવી રહ્યો છે તે મોટા ભાગના સ્થળોએ એલિવેટેડ હશે અને મુંબઈમાં લગભગ 7 કિલોમીટરનો વિસ્તાર સમુદ્રની નીચેથી પસાર થશે.
ઇન્સ્ટાગ્રામ પર આ પોસ્ટ જુઓ
રેલવે મંત્રીએ શેર કરેલા વીડિયોમાં બુલેટ ટ્રેન ટર્મિનલની અદભુત ઝલક જોવા મળી રહી છે. વીડિયો ટ્વીટ કરીને રેલવે મંત્રીએ લખ્યું કે ભારતનું પ્રથમ બુલેટ ટ્રેન ટર્મિનલ! સાબરમતી મલ્ટિમોડલ ટ્રાન્સપોર્ટ હબ, અમદાવાદ.’ આ વિડીયોમાં મનનીય ઝલક રજૂ કરવામાં આવી છે. આટલું જ નહીં, વિડિયો એક ટર્મિનલ બતાવે છે જે આધુનિક આર્કિટેક્ચર અને ભારતના સાંસ્કૃતિક વારસાનું મિશ્રણ દર્શાવે છે.
ભારતમાં પ્રથમ બુલેટ ટ્રેન પ્રોજેક્ટ વર્ષ 2017માં શરૂ કરવામાં આવ્યો હતો. આ ટ્રેન અમદાવાદ-મુંબઈ વચ્ચે દોડશે. બુલેટ ટ્રેન સાબરમતીથી મુંબઈ સુધી 320 કિલોમીટર પ્રતિ કલાકની ઝડપે દોડશે. એટલે કે ટ્રેનની મહત્તમ સ્પીડ 350 કિમી પ્રતિ કલાક હશે. બુલેટ ટ્રેનના કારણે મુસાફરોનો પણ ઘણો સમય બચશે કારણ કે આ ટ્રેન માત્ર બે કલાક સાત મિનિટમાં મુંબઈ પહોંચી જશે. તમને જણાવી દઈએ કે આ યોજનામાં ભારત સરકાર દ્વારા કુલ 1 લાખ 8 હજાર કરોડ રૂપિયાનો ખર્ચ કરવામાં આવી રહ્યો છે, જેમાંથી 81 ટકા રકમ જાપાન સરકાર દ્વારા લોન આપવામાં આવી રહી છે. ઉપરાંત, ભારત સરકારે 50 વર્ષમાં આ નાણાં જાપાનને પરત કરવા પડશે.