અમદાવાદઃ કેન્દ્રીય ગૃહમંત્રી અમિત શાહના ફેક વીડિયો કેસમાં અમદાવાદ ક્રાઈમ બ્રાન્ચે મોટી કાર્યવાહી કરી છે. આ કેસમાં ક્રાઈમ બ્રાન્ચે કોંગ્રેસના ધારાસભ્ય જીગ્નેશ મેવાણીના પીએ સહિત 2 લોકોની ધરપકડ કરી છે. બીજો વ્યક્તિ આમ આદમી પાર્ટીનો કાર્યકર હોવાનું બહાર આવ્યું છે.
પ્રાપ્ત વિગતો મુજબ અમિત શાહની બે બેઠકોના વીડિયો ક્રોપ કરવામાં આવ્યા હતા અને ચોક્કસ એજન્ડા હેઠળ આ વીડિયો વાયરલ કરવામાં આવ્યા હતા. અમદાવાદ ક્રાઈમ બ્રાન્ચે મંગળવારે આ કેસમાં બે આરોપીઓની ધરપકડ કરી હતી. પકડાયેલા આ બે આરોપીઓના નામ સતીષ વાંસોલા અને આર.બી.બારિયા છે. સતીશ વાંસોલા કોંગ્રેસના ધારાસભ્ય જીગ્નેશ મેવાણીના પ્રદેશ કાર્યાલયના પ્રભારી છે જ્યારે આરબી બારિયા આમ આદમી પાર્ટીના દાહોદ જિલ્લા પ્રમુખ છે. બંનેએ આ વીડિયો સોશિયલ મીડિયા પર વાયરલ કર્યો હતો.
આ મામલે અનેક આગેવાનોને નોટિસ
દિલ્હી પોલીસ આ મામલે ઝડપી કાર્યવાહી કરી રહી છે અને ઘણા રાજ્યોમાં તેની તપાસ કરવામાં આવી રહી છે. દિલ્હી પોલીસના સૂત્રોના જણાવ્યા અનુસાર પોલીસ તપાસનો વ્યાપ અનેક રાજ્યોમાં ફેલાયો છે. એડિટેડ વીડિયોની તપાસ માટે દિલ્હી પોલીસની અલગ-અલગ ટીમોને ઝારખંડ, રાજસ્થાન, ઉત્તર પ્રદેશ, મધ્યપ્રદેશ, હરિયાણા અને નાગાલેન્ડ મોકલવામાં આવી છે. પોલીસે નકલી વીડિયો કેસમાં તેલંગાણાના સીએમ રેવંત રેડ્ડીને પણ સમન્સ પાઠવ્યા છે.