સવારે 6 વાગ્યાથી બપોરના 12 વાગ્યા સુધી 77 તાલુકામાં વરસાદ પડ્યો હતો
અમદાવાદઃ
હવામાન વિભાગની આગાહી બાદ અમદાવાદ શહેરમાં મુશળધાર વરસાદ વરસી રહ્યો છે. આ સાથે જ રાજ્યના 125 તાલુકાઓમાં 24 કલાકમાં વરસાદ થયો છે. જેમાં સૌથી વધુ 6 ઈંચ વરસાદ વલસાડના ઉમરગામમાં નોંધાયો છે. તો સવારે 6 થી બપોરના 12 વાગ્યા સુધીમાં 77 તાલુકામાં વરસાદ નોંધાયો છે.
અમદાવાદમાં આજે ભારે વરસાદ પડ્યો છે. રાજ્યમાં આગામી 5 દિવસ સુધી ભારે વરસાદની આગાહી પણ કરવામાં આવી છે. અમદાવાદમાં બપોરના સમયે કાળા ડિબાંગ વાદળો સાથે શહેરના થલતેજ, એસજી હાઇવે, ભોપાલ, જુહાપુરા, વેજલપુર, શિવરંજની વિસ્તારમાં ધોધમાર વરસાદ વરસી રહ્યો છે.
બીજી તરફ વડોદરામાં પણ ભારે વરસાદને કારણે નીચાણવાળા વિસ્તારોમાં પાણી ઘૂસી ગયા છે. વડોદરાના રાવપુરામાં રસ્તાઓ પર પાણી ભરાઈ જવાથી વાહનચાલકો પરેશાન થઈ ગયા છે. આવી સ્થિતિમાં વરસાદે પાલિકાની પ્રિ-મોન્સુન ઝુંબેશને ખુલ્લો પાડી દીધી છે.
વરસાદના કારણે રસ્તાઓ પર પાણી ભરાઈ ગયા છે. વરસાદના કારણે વિઝિબિલિટી ઓછી હોવાથી વાહન ચાલકોને હેડલાઇટ ચાલુ રાખીને વાહન ચલાવવાની ફરજ પડી રહી છે. એસજી હાઈવે પર સોલા, ગોતા, સાયન્સ સિટી સહિતના વિસ્તારોમાં વરસાદને કારણે અનેક જગ્યાએ ટ્રાફિક જામ થઈ ગયો છે.