મુંબઈઃસ્થાનિક ઈક્વિટી બજારોમાં મજબૂત શરૂઆત અને મુખ્ય કરન્સી સામે યુએસ ડોલરમાં નબળાઈને પગલે શુક્રવારે શરૂઆતના વેપારમાં યુએસ ડોલર સામે રૂપિયો 12 પૈસા મજબૂત થઈને 81.96 થયો હતો. ઇન્ટરબેંક ફોરેન એક્સચેન્જ માર્કેટમાં ડોલર સામે રૂપિયો મજબૂત રીતે 81.97 પર ખુલ્યો હતો અને ટૂંકા ગાળામાં 81.96 પર પહોંચી ગયો હતો. આ રીતે, પાછલા ટ્રેડિંગ દિવસની સરખામણીએ રૂપિયામાં 12 પૈસાનો વધારો નોંધવામાં આવ્યો હતો.જો કે, ફોરેક્સ ટ્રેડર્સે જણાવ્યું હતું કે આંતરરાષ્ટ્રીય બજારોમાં ક્રૂડ ઓઇલના ભાવમાં વધારો થવાથી ભારતીય ચલણની મજબૂતાઈ મર્યાદિત થઈ છે. ગુરુવારે રૂપિયો પ્રતિ ડૉલર 82.08 ના સ્તર પર બંધ થયો હતો.
વિશ્વની છ મુખ્ય કરન્સી સામે ડૉલરની મજબૂતાઈને માપતો ડૉલર ઇન્ડેક્સ 0.19 ટકા ઘટીને 99.26 થયો હતો. દરમિયાન, આંતરરાષ્ટ્રીય ઓઇલ બેન્ચમાર્ક બ્રેન્ટ ક્રૂડ ફ્યુચર્સ 0.11 ટકા વધીને બેરલ દીઠ $81.45 પર પહોંચ્યું હતું. શેરબજારમાંથી પ્રાપ્ત માહિતી અનુસાર, વિદેશી સંસ્થાકીય રોકાણકારો (FIIs) એ ફરીથી ખરીદીની પ્રક્રિયા શરૂ કરી અને ગુરુવારે તેઓએ રૂ. 2,237.93 કરોડના શેર ખરીદ્યા. સ્થાનિક શેરબજારો શરૂઆતના સમયગાળામાં ફાયદા સાથે ટ્રેડ કરી રહ્યાં છે. સેન્સેક્સ 358.91 પોઈન્ટ ઉછળીને 65,917.80 પર પહોંચ્યો હતો, જ્યારે નિફ્ટી પણ 106.65 પોઈન્ટ વધીને 19,520.40 પર ટ્રેડ થયો હતો.