મહેસાણા જિલ્લાના સદુથલા ગામના વતની મંગળસિંહ ઝાલા તેમની પત્ની અને પુત્ર સાથે બાઇક પર ડીસા ખાતે તેમના સંબંધીને મળવા જતા હતા. ત્યારે સામેથી પુરપાટ ઝડપે આવી રહેલી કાર અને બાઇક વચ્ચે ટક્કર થઇ હતી.
અકસ્માતમાં બાઇક સવાર દંપતી અને તેમનો પુત્ર રોડ પર પટકાયા હતા અને ગંભીર રીતે ઘાયલ થયા હતા. જેમાં બાઇક ચાલક મંગળસિંહ ઝાલાને ગંભીર ઇજા થતાં ઘટના સ્થળે જ મોત નીપજ્યું હતું. જ્યારે ઇજાગ્રસ્ત પત્ની અને પુત્રને સારવાર માટે 108 એમ્બ્યુલન્સ વાન મારફતે ડીસાની સરકારી હોસ્પિટલમાં દાખલ કરવામાં આવ્યા હતા. બંનેની હાલત નાજુક હોવાથી વધુ સારવાર માટે ખાનગી હોસ્પિટલમાં દાખલ કરવામાં આવ્યા છે. ઘટના બાદ આસપાસના લોકો દોડી આવ્યા હતા અને રાહત કાર્ય શરૂ કર્યું હતું. ડીસા તાલુકા પોલીસે પણ ઘટના સ્થળે પહોંચી કાયદેસરની કાર્યવાહી હાથ ધરી હતી.