ઈન્ડોનેશિયામાં બુધવારે યોજાયેલી રાષ્ટ્રપતિની ચૂંટણીમાં મતદારોએ પોતાનો મત આપ્યો. નવા પ્રમુખની પસંદગી માટે મતદાન થયા બાદ મતગણતરી પણ શરૂ થઈ ગઈ હતી. પ્રારંભિક વલણો આવ્યા પછી, પ્રબોવો સુબિયાન્ટોએ ડેટાના આધારે રાષ્ટ્રપતિની ચૂંટણીમાં જીતનો દાવો કર્યો. ત્રીજી વખત રાષ્ટ્રપતિની ચૂંટણી લડી રહેલા ઇન્ડોનેશિયાના રક્ષા મંત્રી પ્રબોવો સુબિયાન્ટોએ 58 ટકા વોટ સાથે પોતાના હરીફો પર લીડ મેળવી લીધી છે.
વલણો પછી, સુબિયાન્ટોએ તેની જીતની જાહેરાત કરી અને કહ્યું કે તે દેશને નવી ઊંચાઈઓ પર લઈ જશે. જો કે જાણકારી માટે તમને જણાવી દઈએ કે સુબિયાંટોને દેશમાં લોકશાહી વિરોધી નેતા તરીકે ઓળખવામાં આવે છે.ઇન્ડોનેશિયાના લગભગ 20 કરોડ લોકોએ બુધવારે પોતાના રાષ્ટ્રપતિને ચૂંટવા માટે મતદાન કર્યું હતું. કુલ નોંધાયેલા મતદારોમાંથી 80 ટકાએ તેમના મતાધિકારનો ઉપયોગ કર્યો હતો.
જો કે મતગણતરી બાદ આ અંગે ચૂંટણી અધિકારીઓ દ્વારા કોઈ સત્તાવાર જાહેરાત કરવામાં આવી નથી. બીજી તરફ પ્રમુખની ચૂંટણીની સાથે ઉપરાષ્ટ્રપતિ અને સંસદીય પ્રતિનિધિઓની ચૂંટણી માટે પણ મતદાન થયું હતું. કેન્દ્રોમાંથી પ્રારંભિક વલણો અને બિનસત્તાવાર પરિણામો ટૂંક સમયમાં અપેક્ષિત છે પરંતુ સત્તાવાર અને અંતિમ પરિણામો લગભગ એક મહિનામાં આવશે.