ઊંઝા શહેર અને આસપાસના વિસ્તારોમાં ભેળસેળની પ્રવૃતિઓ દિવસેને દિવસે ફૂલીફાલી રહી છે. જીરામાં જબરદસ્ત તેજીએ ભેળસેળિયા તત્વોને મોટી કમાણી કરવાની તક આપી છે. ત્યારે ઉઝા તાલુકાના મકતુપુરમાં વરિયાળીમાંથી નકલી જીરું બનાવતી ફેક્ટરી ઝડપાતા ભેળસેળિયા તત્વોમાં ફફડાટ ફેલાયો છે.
મળતી માહિતી મુજબ ફૂડ એન્ડ ડ્રગ વિભાગ ગાંધીનગર પાટણના સંયુકત ઉપક્રમે ઊંઝા તાલુકાના મકતુપુરમાંથી વરિયાળીમાંથી નકલી જીરું બનાવતી વેરહાઉસ ઝડપી પાડી છે. મકતુપુર સણક રોડ પર આવેલા પટેલ મહેન્દ્ર મફતલાલ નામના ગોડાઉનમાંથી 2700 કિલો નકલી જીરૂની 54 બોરીઓ જપ્ત કરી કબજે કરવામાં આવી હતી. વરિયાળીની ભૂકીને પ્રોસેસ કરીને, તેને સિમેન્ટ અને ગોળથી કોટિંગ કરીને બનાવટી જીરું બનાવવામાં આવતું હતું. ગાંધીનગરના ફૂડ એન્ડ ડ્રગ વિભાગના કે.આર.પટેલે સેમ્પલ મેળવી લેબોરેટરીમાં પરીક્ષણ માટે મોકલી આપ્યા છે.