નવી દિલ્હી : વડાપ્રધાન નરેન્દ્ર મોદીના નેતૃત્વમાં એક દાયકા કરતાં પણ ઓછા સમયમાં ભારત બદલાયું છે. સાથે જ આજે તે વિશ્વ વ્યવસ્થામાં સ્થાન હાંસલ કરવાની દિશામાં આગળ વધી રહી છે. અમેરિકન બ્રોકરેજ કંપની મોર્ગન સ્ટેનલી રિસર્ચ દ્વારા બહાર પાડવામાં આવેલા રિપોર્ટમાં આ વાત કહેવામાં આવી છે.
મોર્ગન સ્ટેનલીના અહેવાલ મુજબ, ભારત એશિયન અને વૈશ્વિક વિકાસમાં મહત્વપૂર્ણ ભૂમિકા ભજવવા માટે તૈયાર છે. રિપોર્ટમાં કહેવામાં આવ્યું છે કે ભારત એક દાયકા કરતાં પણ ઓછા સમયમાં મજબૂત બન્યું છે. આ ભારત 2013થી અલગ છે, જેણે દસ વર્ષના ટૂંકા ગાળામાં વિશ્વ વ્યવસ્થામાં પોતાનું આગવું સ્થાન બનાવ્યું છે.
બ્રોકરેજ કંપનીએ વડા પ્રધાન મોદીએ સત્તા સંભાળ્યા પછી 2014 થી અત્યાર સુધીમાં થયેલા 10 મોટા ફેરફારોનો ઉલ્લેખ કર્યો છે. રિપોર્ટ અનુસાર ભારતમાં કોર્પોરેટ ટેક્સનો દર અન્ય દેશોની સમકક્ષ કરવામાં આવ્યો છે. આ ઉપરાંત ઈન્ફ્રાસ્ટ્રક્ચરમાં રોકાણ વધી રહ્યું છે. રિપોર્ટમાં કહેવામાં આવ્યું છે કે ગુડ્સ એન્ડ સર્વિસ ટેક્સ (GST)નું કલેક્શન સતત વધી રહ્યું છે. આ સાથે, ગ્રોસ ડોમેસ્ટિક પ્રોડક્ટ (જીડીપી)ની ટકાવારી તરીકે ડિજિટલ વ્યવહારો વધી રહ્યા છે, જે સંગઠિત અર્થતંત્રની નિશાની છે.