કડીની સિવિલ કોર્ટ સામે ગત રાત્રે એક કાર ડિવાઈડર સાથે અથડાતા પલટી ખાઈ જતા અફરા-તફરીનો માહોલ સર્જાયો હતો. જો કે સદનસીબે મોટો અકસ્માત ટળી ગયો હતો.કડી નગરના હાઇવે ચાર રસ્તાથી પીર બોરડી ઢોળાવ તરફ પુરપાટ ઝડપે જઇ રહેલ ક્રેટા વાહન નંબર GJ 27 CF 4983. ક્રેટા કાર સિવિલ કોર્ટ સામે પહોંચી ત્યારે અચાનક ડ્રાઈવર સાઇડનું ટાયર ડિવાઈડર સાથે અથડાતા કાર 25 ફૂટ દૂર જઈને પલટી મારી ગઈ હતી. અકસ્માતને પગલે લોકોના ટોળા એકત્ર થઈ ગયા હતા. જ્યાં કારમાં બેઠેલા ચાર લોકોને સ્થાનિક લોકોએ સલામત રીતે બહાર કાઢ્યા હતા.
સિવિલ કોર્ટ સામે ક્રેટા વાહન ડિવાઈડર સાથે અથડાતા ડિવાઈડર પરની ગ્રીડ પણ તૂટી ગઈ હતી. તે જ સમયે, વાહન ડિવાઈડરની વચ્ચે મૂકેલા ઈલેક્ટ્રીક પોલ સાથે અથડાયું હતું અને ત્યારબાદ વાહન પલટી ગયું હતું. જેના કારણે વીજ પોલ પણ પડી ગયો હતો. સદનસીબે કારની અંદર એરબેગ તૈનાત હોવાથી ચારેયના જીવ બચી ગયા હતા.