સમગ્ર રાજ્યમાં અમદાવાદમાં સૌથી વધુ 42.3 ડિગ્રી સેલ્સિયસ તાપમાન નોંધાયું હતું.
અમદાવાદઃ
વેસ્ટર્ન ડિસ્ટર્બન્સના પ્રભાવ હેઠળ ગુજરાતમાં આગામી 2 દિવસ સુધી કમોસમી વરસાદની આગાહી કરવામાં આવી છે. આવતીકાલ અને 29મીએ સોમવાર એમ બે દિવસ રાજ્યના વિવિધ ભાગોમાં વરસાદની શક્યતા હવામાન વિભાગે વ્યક્ત કરી છે. હવામાન વિભાગના જણાવ્યા અનુસાર રાજકોટ, ભાવનગર, જૂનાગઢ, પોરબંદર, પાટણ, મહેસાણા, બનાસકાંઠા, સાબરકાંઠા, આણંદ, ભરૂચ, મહિસાગર અને વડોદરા સહિતના જિલ્લાઓમાં વરસાદની સંભાવના છે.
આ દરમિયાન 30 થી 40 કિલોમીટર પ્રતિ કલાકની ઝડપે પવન ફૂંકાઈ શકે છે. હવામાન વિભાગ દ્વારા ભારે પવનની આગાહીને પગલે રાજ્યના માછીમારોને આગામી 3 દિવસ દરિયો ખેડવાની સૂચના આપવામાં આવી છે. આજના તાપમાનની વાત કરીએ તો આજે અમદાવાદમાં સૌથી વધુ 42.3 ડિગ્રી સેલ્સિયસ તાપમાન નોંધાયું હતું. જ્યારે રાજકોટમાં મહત્તમ તાપમાન 40 ડિગ્રી, સુરતમાં 33.8 ડિગ્રી અને વડોદરામાં 38.8 ડિગ્રી નોંધાયું હતું.
હવામાન વિભાગે આગાહી કરી છે કે દક્ષિણ પશ્ચિમ ચોમાસું 4 જૂનની આસપાસ કેરળ પહોંચશે. ચોમાસાની સિઝનના 4 મહિના દરમિયાન, દેશના મોટાભાગના ભાગોમાં લગભગ 96 ટકા વરસાદ પડે છે.
જો ગુજરાતની વાત કરીએ તો 22 જૂનની આસપાસ રાજ્યમાં નિયમિત ચોમાસું શરૂ થશે. અમદાવાદમાં શુક્રવારે સાંજે અચાનક વાતાવરણમાં પલટો આવ્યો હતો અને ગાજવીજ અને વરસાદને કારણે વાતાવરણ ઠંડુગાર બની ગયું હતું.