(જીએનએસ), 30
અમદાવાદ સહિત અનેક શહેરો અને જિલ્લા મથકોમાં ટ્રાફિક, પ્રદુષણ, નદીઓમાં વહેતો ઔદ્યોગિક કચરો સહિતની નાગરિક સેવાઓની અનેક સમસ્યાઓ છે, પરંતુ કેન્દ્ર સરકારના સ્માર્ટ સિટી મિશન હેઠળ ગુજરાતમાં કુલ 344 પૈકી 285 કામો પૂર્ણ થયા છે. એટલું જ નહીં, આ કામ પાછળ રૂ. 9087.17 કરોડનો ખર્ચ પણ થયો છે! સ્માર્ટ સિટી પ્રોજેક્ટ હેઠળ 59 જેટલા કામો ચાલી રહ્યા છે, જેના માટે કુલ રૂ. 3384.95 કરોડનો ખર્ચ થશે. અહેવાલ મુજબ કેન્દ્ર સરકાર દ્વારા ગુજરાત સહિત દેશમાં સ્માર્ટ સિટી મિશન શરૂ કરવામાં આવ્યું છે. આ અંતર્ગત દેશના 100 શહેરોમાં 7978 પ્રોજેક્ટ્સમાંથી 5909 પ્રોજેક્ટ્સ (74 ટકા) પૂર્ણ થયા છે. જુલાઈ 7-2023 સુધીમાં, કેન્દ્ર સરકારે 100 શહેરો માટે રૂ. 73,454 કરોડની ગ્રાન્ટ જાહેર કરી છે, જેમાંથી રૂ. 66,203 કરોડનો ખર્ચ કરવામાં આવ્યો છે. બાકીના પ્રોજેક્ટ માટે કેન્દ્ર સરકાર દ્વારા જૂન-2024 સુધી સમય મર્યાદા લંબાવવામાં આવી છે, જેથી તે શહેરોના કામો ત્યાં સુધીમાં પૂર્ણ થઈ શકે. ગુજરાતમાં સ્માર્ટ સિટી હેઠળ 12472.12 કરોડના ખર્ચ સાથે કુલ 344 પ્રોજેક્ટ હાથ ધરવામાં આવ્યા હતા. આ પ્રોજેક્ટમાં મજબૂત આઇટી કનેક્ટિવિટી, ઇ-ગવર્નન્સ, ડિજિટલાઇઝેશનના કામોમાં વધારો, ઘન કચરાના નિકાલ માટે યોગ્ય વ્યવસ્થા, જાહેર પરિવહન, આરોગ્ય-શિક્ષણની શહેરી સુવિધાઓમાં વધારો, પર્યાવરણમાં સુધારો, બાળકો, વૃદ્ધ-મહિલાઓ, સુરક્ષા વગેરેને લગતી સુવિધાઓનો સમાવેશ થાય છે. અમદાવાદ શહેરમાં 67 કામો પાછળ 2511 કરોડનો ખર્ચ થયો છે અને 792 કરોડના 3 કામ બાકી છે. ગાંધીનગરમાં 26 કામો માટે 500 કરોડ, રાજકોટમાં 42 કામો માટે 993 કરોડ, સુરતમાં 79 કામો માટે 2811 કરોડ, વડોદરામાં 36 કામો માટે 1596 કરોડ. જ્યારે દાહોદમાં 325 કરોડના 12 કામો, ગાંધીનગરમાં 506 કરોડના 6 કામો, રાજકોટમાં 1167 કરોડના 29 કામો, સુરતમાં 245 કરોડના 3 કામો અને વડોદરામાં 347 કરોડના 4 કામ બાકી છે. જે આગામી સમયમાં પૂર્ણ કરવામાં આવશે.