ભારતના પ્રથમ ઓપરેશનલ સ્માર્ટ સિટી અને દેશની પ્રથમ ફાઇનાન્શિયલ ટેક સિટી તરીકે જાણીતું, GIFT સિટી પ્રથમ વખત આંતરરાષ્ટ્રીય ચર્ચા મંચ બનવા જઈ રહ્યું છે. ભારતના G20 પ્રેસિડેન્સી હેઠળ નાણા અને સેન્ટ્રલ બેંકના ડેપ્યુટી ગવર્નરોની ત્રીજી બેઠક ગુજરાતમાં યોજાવા જઈ રહી છે. આ બેઠકના ભાગરૂપે ‘ગિફ્ટ સિટી ખાતે ઈન્ફ્રાસ્ટ્રક્ચર ઈન્વેસ્ટર્સ ડાયલોગ’ પર એક બેઠકનું આયોજન કરવામાં આવ્યું છે. આ બેઠકમાં G20 દેશોના અગ્રણી પ્રતિનિધિઓ, નાણા મંત્રીઓ અને કેન્દ્રીય બેંકના ગવર્નરો હાજર રહેશે. આ કાર્યક્રમમાં ગુજરાતના મુખ્યમંત્રી ભૂપેન્દ્ર પટેલ પણ હાજર રહેશે.
GIFT એટલે ગુજરાત ઇન્ટરનેશનલ ફાઇનાન્સ ટેક-સિટી એ ભારતનું પ્રથમ ઇન્ટરનેશનલ ફાઇનાન્સિયલ સર્વિસ સેન્ટર (IFSC) સાથેનું બહુ-સેવા વિશેષ આર્થિક ક્ષેત્ર છે. IFSC એ GIFT સિટીમાં માત્ર ભારત માટે જ નહીં, પરંતુ વિશ્વ માટે એક સંકલિત નાણાકીય અને તકનીકી સેવા કેન્દ્ર તરીકે સ્થિત છે.
ગિફ્ટ સિટીમાં ‘ગિફ્ટ નિફ્ટી’નું આગમન ગુજરાતને આંતરરાષ્ટ્રીય પ્રસિદ્ધિમાં લાવે છે
નોંધપાત્ર વાત એ છે કે આ બેઠકના થોડા દિવસ પહેલા જ ગુજરાતે આંતરરાષ્ટ્રીય સ્તરે એક મોટી સિદ્ધિ હાંસલ કરી છે. સિંગાપોર જોઈન્ટ એક્સચેન્જ (SGX નિફ્ટી) જે સિંગાપોરથી કાર્યરત હતું તે હવે સંપૂર્ણપણે GIFT સિટીમાં શિફ્ટ થઈ ગયું છે અને હવે તે ભારતના પ્રથમ ઈન્ટરનેશનલ ફાઈનાન્સિયલ સર્વિસિસ સેન્ટર (IFSC)થી કાર્યરત છે.
SGX નિફ્ટી એ ભારતના નેશનલ સ્ટોક એક્સચેન્જ (NSE) ના નિફ્ટી ઇન્ડેક્સ પર આધારિત છે અને ભારત અને સિંગાપોરના મૂડી બજારોને જોડતી પ્રથમ ક્રોસ-બોર્ડર (આંતરરાષ્ટ્રીય) પહેલ છે. સિંગાપોર એક્સચેન્જ (SGX) થી ઇન્ટરનેશનલ એક્સચેન્જ ઓફ NSE (NSE IX) માં સ્થળાંતર સાથે, તેનું નામ GIFT નિફ્ટી રાખવામાં આવ્યું છે.