ગુજરાત વિધાનસભાનું બજેટ સત્ર 1લી ફેબ્રુઆરીથી 29મી ફેબ્રુઆરી દરમિયાન યોજાશેઃ- સ્પીકર શ્રી શંકરભાઈ ચૌધરી
ધારાસભ્યો ડિજિટલ એસેમ્બલીમાં ઓનલાઈન તારાંકિત પ્રશ્નો પૂછશેઃ અધ્યક્ષ શ્રી શંકરભાઈ ચૌધરી
ગુજરાતનું બજેટ 2 ફેબ્રુઆરીએ વિધાનસભામાં રજૂ કરવામાં આવશે
(GNS),તા.30
ગાંધીનગર,
ગુજરાતના રાજ્યપાલ શ્રી આચાર્ય દેવવ્રતજીએ ગુજરાત વિધાનસભાનું ચોથું સત્ર બોલાવ્યું છે. તો ગુજરાત વિધાનસભાનું ચોથું સત્ર 1લી ફેબ્રુઆરીથી 29મી ફેબ્રુઆરી દરમિયાન આખા મહિના દરમિયાન ચાલશે. જેમાં રાજ્ય સરકાર વિધાનસભામાં બજેટ રજૂ કરશે. જ્યારે કુલ 24 કામકાજના દિવસોમાં કુલ 26 બેઠકો ઉપલબ્ધ થશે.
વિધાનસભાના ચોથા સત્ર અંગે વિધાનસભા અધ્યક્ષ શંકરભાઈ ચૌધરીએ જણાવ્યું હતું કે ગુજરાત રાજ્ય વિધાનસભાનું બજેટ સત્ર 1 ફેબ્રુઆરીથી શરૂ થશે. તેથી વિધાનસભાના બજેટ સત્રની તૈયારીઓ શરૂ કરી દેવામાં આવી છે. ગુજરાત વિધાનસભાના ચોથા સત્રમાં 2 ફેબ્રુઆરીએ વિધાનસભા ગૃહમાં બજેટ રજૂ કરવામાં આવશે. રાજ્યપાલના સંબોધન પર ચર્ચા ત્રણ દિવસ સુધી ચાલશે. ચાર દિવસ સુધી બજેટ પર સામાન્ય ચર્ચા થશે. જ્યારે વિવિધ વિભાગોની માંગણીઓ અંગે 12 દિવસ સુધી ચર્ચા કરવામાં આવશે. આમ, આખા ફેબ્રુઆરી મહિનામાં વિધાનસભાનું સત્ર ચાલુ રહેશે.
વિધાનસભાના અધ્યક્ષ શંકરભાઈ ચૌધરીએ વધુમાં જણાવ્યું હતું કે, ગુજરાત વિધાનસભા હવે ભૌતિકમાંથી ડિજિટલ બની છે. વિધાનસભાની કામગીરી ડિજિટલ રીતે હાથ ધરવામાં આવે તે માટે તમામ ધારાસભ્યોને તાલીમ પણ આપવામાં આવી છે. આ સત્ર દરમિયાન તમામ ધારાસભ્યો તારાંકિત પ્રશ્નો ઓનલાઈન પૂછશે. જે માટેની તાલીમ અને તૈયારીઓ પૂર્ણ કરી દેવામાં આવી છે. આગામી વિધાનસભા સત્ર દરમિયાન ધારાસભ્યો ઓનલાઈન માધ્યમથી વધુમાં વધુ ગૃહનું કામ કરે તે સુનિશ્ચિત કરવાના પ્રયાસો કરવામાં આવશે.