આરોગ્ય ટીમ દ્વારા 9 હજાર લોકોનો સર્વે
આરોગ્ય તંત્ર દ્વારા કલોણાવાસીઓને ઉકાળેલું પાણી પીવા અને વારંવાર હાથ ધોવાની અપીલ કરવામાં આવી છે
(GNS),તા.02
ગાંધીનગર,
આજે આરોગ્ય તંત્રએ કલોલ શહેરના પૂર્વ વિસ્તારમાં ઝાડા-ઉલ્ટીના કેસ શોધી કાઢવા સર્વેની કામગીરી શરૂ કરી હતી. આરોગ્યની 36 ટીમો દ્વારા 1880 મકાનોમાં રહેતા 9 હજાર જેટલા નાગરિકોનો સર્વે કરવામાં આવ્યો હતો.
કલોલ શહેરના પૂર્વ વિસ્તારમાં ઉલ્ટીના કેસો સામે આવતા જિલ્લા કલેક્ટર શ્રી મેહુલ દવેએ ગઈકાલે આ વિસ્તારની મુલાકાત લીધી હતી. આરોગ્ય તંત્ર સાથે તાકીદની બેઠકનું આયોજન કરવામાં આવ્યું હતું. કલેકટરે જિલ્લા આરોગ્ય તંત્રને તાત્કાલિક આરોગ્ય સંબંધિત સેવાઓ ઝડપી બનાવવા અને સર્વેલન્સ હાથ ધરવા સૂચના આપી હતી. કલેકટરની સૂચનાના પગલે ગાંધીનગર જિલ્લા આરોગ્ય તંત્ર દ્વારા કલોલ પૂર્વ વિસ્તારમાં સર્વેલન્સની કામગીરી સઘન બનાવી દેવામાં આવી હતી. અને આરોગ્યની 36 ટીમો એક સાથે કામ કરી રહી હતી. ટીમો દ્વારા 1880 ઘરોનો સર્વે કરવામાં આવ્યો હતો. 8,858 નાગરિકોની આરોગ્ય તપાસ કરવામાં આવી હતી. આરોગ્યની ટીમે કરેલી તપાસ દરમિયાન ઉલ્ટીના 31 કેસ મળી આવ્યા હતા.
સર્વે દરમિયાન મળી આવેલા 9 નવા દર્દીઓને સામૂહિક આરોગ્ય કેન્દ્ર, કલોલમાં દાખલ કરવામાં આવ્યા હતા. 2 દર્દીઓને ગાંધીનગર સિવિલ હોસ્પિટલમાં સારવાર માટે લાવવામાં આવ્યા છે. હાલ 24 દર્દીઓ સારવાર હેઠળ છે. તાલુકા હેલ્થ ઓફિસર, કલોલના જણાવ્યા મુજબ, શ્યામ હાઇટ્સ પાસે પાણીની પાઇપલાઇનમાં નવી લીકેજ જોવા મળી હતી અને તેને રિપેર કરવાની કામગીરી શરૂ કરવામાં આવી છે. કુલ દાખલ દર્દીઓમાંથી 4ના સ્ટૂલ સેમ્પલ પરીક્ષણ માટે મોકલવામાં આવ્યા છે. પાણીના 7 સેમ્પલ પરીક્ષણ માટે મોકલવામાં આવ્યા છે. આ વિસ્તારની સોસાયટીના તમામ લોકોનો સર્વે કરવામાં આવ્યો છે. ક્લોરીનની ગોળીઓ અને ઓઆરએસનું વિતરણ કરવામાં આવ્યું છે. આરોગ્ય તંત્ર દ્વારા સ્થાનિક રહેવાસીઓને પણ ઉકાળેલું પાણી પીવા અને વારંવાર હાથ ધોવાની ચેતવણી આપવામાં આવી છે. આરોગ્ય તંત્ર આગામી દિવસોમાં પણ સઘન સર્વેલન્સની કામગીરી ચાલુ રાખશે.