– 6 દર્દીઓને રજા આપવામાં આવી:- હાલમાં પાંચ દર્દીઓ હોસ્પિટલમાં સારવાર હેઠળ છે.
– આરોગ્ય ટીમ દ્વારા 11 હજાર લોકોનો સર્વે
– આરોગ્ય તંત્ર કલોલાના રહેવાસીઓને ઉકાળેલું પાણી પીવા અને વારંવાર હાથ ધોવાની અપીલ કરે છે
(GNS),તા.03
કલોલ,
કલોલ શહેરના પૂર્વ વિસ્તારમાં ઝાડા-ઉલ્ટીના કેસો અંગે આરોગ્ય તંત્રએ આજે સઘન સર્વે હાથ ધર્યો હતો. આ મુજબ આરોગ્યની 42 ટીમો દ્વારા 2485 ઘરોમાં 11 હજારથી વધુ નાગરિકોનો સર્વે કરવામાં આવ્યો હતો.
કલોલ શહેરના પૂર્વ વિસ્તારમાં ઝાડા-ઉલ્ટીના કેસોને ધ્યાને લઇ જિલ્લા કલેકટર શ્રી મેહુલ દવેએ આરોગ્ય તંત્ર સાથે તાકીદની બેઠક યોજી હતી. કલેકટરે જિલ્લા આરોગ્ય તંત્રને તાત્કાલિક આરોગ્ય સંબંધિત સેવાઓ ઝડપી બનાવવા અને સર્વેલન્સ હાથ ધરવા સૂચના આપી હતી. કલેકટરની સૂચનાના પગલે ગાંધીનગર જિલ્લા આરોગ્ય તંત્રએ આજે કલોલ પૂર્વ વિસ્તારમાં સર્વેલન્સની કામગીરી સઘન બનાવી છે. અને આરોગ્યની 42 ટીમો એક સાથે કામ કરી રહી હતી. ટીમો દ્વારા 2485 ઘરોનો સર્વે કરવામાં આવ્યો હતો. 11,079 નાગરિકોની આરોગ્ય તપાસ કરવામાં આવી હતી. આરોગ્ય ટીમ દ્વારા તપાસ દરમિયાન ગંભીર ઉલ્ટીના 16 કેસ નોંધાયા હતા. દરમિયાન કલોલ હોસ્પિટલમાં સારવાર લઈ રહેલા છ દર્દીઓને રજા આપી દેવામાં આવી છે, જ્યારે સારવાર લઈ રહેલા પાંચ દર્દીઓની તબિયતમાં સુધારો થઈ રહ્યો છે.
આજે પણ અસરગ્રસ્ત વિસ્તારોમાં ક્લોરીનની ગોળીઓ અને ઓઆરએસનું વિતરણ કરવામાં આવ્યું છે. આરોગ્ય તંત્ર દ્વારા સ્થાનિક રહેવાસીઓને પણ ઉકાળેલું પાણી પીવા અને વારંવાર હાથ ધોવાની ચેતવણી આપવામાં આવી છે. આરોગ્ય તંત્ર આગામી દિવસોમાં પણ સઘન સર્વેલન્સની કામગીરી ચાલુ રાખશે.