EV મેન્યુફેક્ચરિંગ પ્લાન્ટ સ્થાપવા માટે રૂ. 2000 કરોડનું રોકાણ કરશે
(GNS),તા.10
જેન્સોલ એન્જિનિયરિંગ ગુજરાતમાં EV ઉત્પાદન પ્લાન્ટ સ્થાપવા માટે રૂ. 2000 કરોડનું રોકાણ કરશે. વાઇબ્રન્ટ ગુજરાત ગ્લોબલ સમિટ 2024 માટે ઇન્વેસ્ટમેન્ટ પ્રમોશન એક્ટિવિટીના ભાગ રૂપે ગુજરાત સરકાર સાથે આ સંદર્ભે એક મેમોરેન્ડમ ઑફ અન્ડરસ્ટેન્ડિંગ (MOU) પર હસ્તાક્ષર કરવામાં આવ્યા હતા. કંપનીએ સ્ટોક એક્સચેન્જમાં કરેલી ફાઇલિંગમાં કહ્યું છે કે આ પ્રોજેક્ટથી લગભગ 1500 નોકરીઓનું સર્જન થશે. છેલ્લા એક વર્ષમાં રોકાણકારોને આ સ્ટૉકમાં 145% થી વધુ વળતર મળ્યું છે જ્યારે ત્રણ વર્ષના ટ્રેક પર નજર કરીએ તો રોકાણકારોને 4100% વળતર મળ્યું છે.
વાઈબ્રન્ટ ગુજરાત ગ્લોબલ સમિટની 10મી આવૃત્તિ ગુજરાતની રાજધાની ગાંધીનગરમાં 10 થી 12 જાન્યુઆરી દરમિયાન યોજાશે. જેમાં જેન્સોલ ગ્રૂપના સહ-સ્થાપક અનમોલ સિંહ જગ્ગીએ જણાવ્યું હતું કે રૂ. 2,000 કરોડનું રોકાણ એ રાજ્યના સતત વિકાસ અને ગ્રીન મેન્યુફેક્ચરિંગ પ્રત્યેની અમારી પ્રતિબદ્ધતા પ્રત્યેના અમારા વિશ્વાસનો પુરાવો છે. અમે પરસ્પર લાભદાયી ભાગીદારીની આશા રાખીએ છીએ જે ગુજરાતને ઇલેક્ટ્રિક વાહન ક્રાંતિમાં નવી ઊંચાઈઓ પર લઈ જશે.
જેન્સોલ એન્જિનિયરિંગનો શેર મંગળવાર, 9 જાન્યુઆરી, 2024 ના રોજ 5 ટકાની ઉપલી સર્કિટ પર પહોંચ્યો હતો અને રૂ. 843.75 પર પહોંચી ગયો હતો. આજે બુધવારે બપોરે 12 વાગ્યે શેર રૂ. 873.80 પર હતો, જ્યારે તે રૂ. 39.20 અથવા 4.70%નો ઉછાળો નોંધાવી રહ્યો હતો.કંપનીનું માર્કેટ કેપ રૂ. 3,170.72 કરોડ. જેન્સોલ એન્જિનિયરિંગના શેરોએ રોકાણકારોને મલ્ટિબેગર વળતર આપ્યું છે. શેરે માત્ર 1 વર્ષમાં 146 ટકા અને 2 વર્ષમાં 1676 ટકા વળતર આપ્યું છે. જ્યારે 3 વર્ષમાં શેરનું વળતર 4,100 ટકા હતું.