અમેરિકાએ ઈરાન અને તેના દ્વારા સમર્થિત ‘મિલિશિયા’ (નાગરિક લડવૈયાઓ)ને ચેતવણી આપી છે અને કહ્યું છે કે જો તેઓ પશ્ચિમ એશિયામાં તૈનાત અમેરિકી દળોને નિશાન બનાવવાનું ચાલુ રાખશે તો તે બદલો લેશે. તાજેતરમાં, જોર્ડનમાં ઈરાન સમર્થિત જૂથ દ્વારા કરવામાં આવેલા ડ્રોન હુમલામાં ત્રણ અમેરિકન સૈનિકો માર્યા ગયા હતા અને 40 થી વધુ સૈનિકો ઘાયલ થયા હતા. જોર્ડનમાં તેના સૈનિકો પરના હુમલાનો બદલો લેતા યુ.એસ.એ શુક્રવારે ઈરાક અને સીરિયામાં ઈરાન સમર્થિત મિલિશિયા અને ઈરાની રિવોલ્યુશનરી ગાર્ડના 85 લક્ષ્યાંકો પર હુમલો કર્યો. આ પછી અમેરિકી અને બ્રિટિશ દળોએ પણ શનિવારે યમનમાં હુતીના નિયંત્રણવાળા વિસ્તારોમાં હુમલો કર્યો હતો.
જો ઈરાને અમેરિકા સામે સીધો જવાબ આપવાનો વિકલ્પ પસંદ કર્યો તો…
યુએસ પ્રમુખ જૉ બિડેનના રાષ્ટ્રીય સુરક્ષા સલાહકાર જેક સુલિવાને જણાવ્યું હતું કે જો ઈરાન અમેરિકાને “સીધો જવાબ આપવાનું પસંદ કરે છે” તો તેણે “ઝડપી અને મજબૂત જવાબ” માટે તૈયાર રહેવું જોઈએ. સુલિવાને કહ્યું, અમે ઈરાક અને સીરિયામાં ઈરાન સમર્થિત મિલિશિયા અથવા હુથી બળવાખોરો દ્વારા ભવિષ્યમાં હુમલાની શક્યતાને નકારી શકીએ નહીં. જ્યારે તેમને ઈરાનની અંદર હુમલાની શક્યતા વિશે પૂછવામાં આવ્યું ત્યારે તેમણે કહ્યું કે બિડેન “મોટા પાયાનું યુદ્ધ ઇચ્છતા નથી.” પરંતુ જ્યારે ઈરાન દ્વારા સીધા હુમલાની શક્યતા વિશે પૂછવામાં આવ્યું ત્યારે તેમણે કહ્યું. જો તેઓ અમેરિકાને સીધો જવાબ આપવાનું પસંદ કરે તો , તેઓને અમારી તરફથી તાત્કાલિક અને મજબૂત પ્રતિસાદ મળશે.
અમેરિકાને ચેતવણી આપી
બીજી તરફ, ઈરાને પશ્ચિમ એશિયામાં બે માલવાહક જહાજોને નિશાન બનાવવાની સંભાવનાને લઈને અમેરિકાને ચેતવણી આપી છે, જે ઈરાનના ‘રિવોલ્યુશનરી ગાર્ડ’ માટે જાસૂસી કરવાની શંકા છે. ‘બેહશાદ’ અને ‘સાવિઝ’ જહાજો પર હુમલાની સંભાવનાને લગતું ઈરાનનું નિવેદન ઈરાક, સીરિયા અને યમનમાં ઈસ્લામિક રિપબ્લિક દ્વારા સમર્થિત મિલિશિયાને નિશાન બનાવી રહેલા અમેરિકાના તાજેતરના હુમલાઓને લઈને તેહરાનની વધતી જતી અસ્વસ્થતા તરફ ઈશારો કરે છે. ઈરાનની નિયમિત સૈન્યએ રવિવારે જારી કરેલા એક નિવેદનમાં જણાવ્યું હતું કે, “બેહશાદ અથવા તેના જેવા જહાજો સામે આતંકવાદી પ્રવૃત્તિઓમાં સામેલ લોકો આંતરરાષ્ટ્રીય દરિયાઈ માર્ગો અને સુરક્ષાને જોખમમાં મૂકે છે અને ભવિષ્યના આંતરરાષ્ટ્રીય જોખમો માટે જવાબદાર છે.”