આ સમયે ગણેશ ચતુર્થીના તહેવારની ધામધૂમથી ઉજવણી કરવામાં આવી રહી છે. ચોરો પણ સક્રિય બન્યા છે. સુરતની મહિધરપુરા પોલીસે ગણપતિ બાપ્પાના દર્શન કરવા આવેલા લોકોને ટાર્ગેટ બનાવી મોબાઈલ ફોનની ચોરી કરનાર બે ચોરને પકડી પાડ્યા હતા. આરોપીઓ પાસેથી ચોરીના 7 મોબાઈલ ફોન પણ મળી આવ્યા છે.
સુરતમાં ગણેશ ચતુર્થીના તહેવારને લઈને ભારે ઉત્સાહ જોવા મળી રહ્યો છે. ગણપતિ બાપ્પાના આગમન માટે શહેરના વિવિધ વિસ્તારોમાં ભવ્ય આયોજન કરવામાં આવ્યું હતું. ચોર ગણપતિ બાપાની શોભા યાત્રામાં ભાગ લેતા હતા અને આ દરમિયાન લોકો પર નજર રાખીને તેમના ખિસ્સામાંથી મોબાઈલ ફોન ચોરી લેતા હતા.
મહિધરપુરા પોલીસે ગુપ્ત બાતમીના આધારે મોબાઈલ ફોન ચોરીમાં સંડોવાયેલી સક્રિય ગેંગના બે સભ્યોની ધરપકડ કરી છે. આરોપી નદીમ સિકંદર શેખ, ઝફર અબ્દુલ રઝાક શેખ બંને ગણપતિ બાપ્પાની શોભા યાત્રામાં ભાગ લેતા હતા અને ભીડનો લાભ લઈ લોકોના ખિસ્સામાંથી મોબાઈલ ફોનની ચોરી કરી ભાગી જતા હતા. પોલીસે ચોરીના 7 મોબાઈલ ફોન સાથે આ બે આરોપીઓની ધરપકડ કરી કાર્યવાહી હાથ ધરી છે.
હાલમાં ગણપતિ બાપ્પાના આગમન બાદ શહેરના અનેક બાપ્પાના પંડાલોમાં ભવ્ય આરતીની સાથે સામાજિક અને સાંસ્કૃતિક કાર્યક્રમોનું આયોજન કરવામાં આવી રહ્યું છે, આથી લોકોએ આવી મોબાઈલ ચોરી કરતી ટોળકીથી સાવધ રહેવાની જરૂર છે.