ડીસામાં બનાસ નદી નજીક પટેલ વાડી પાસેના મકાનમાંથી લોખંડની જાળી સાથે કપડાથી બાંધેલી યુવાનની લાશ મળી આવી હતી. ઘટનાની જાણ થતાં જ ડીસા તાલુકા પોલીસ તાત્કાલિક ઘટના સ્થળે પહોંચી ગઈ હતી. જ્યાં યુવકની લાશ આપઘાત કરેલી હાલતમાં મળી આવી હતી અને તેમાંથી આવતી તીવ્ર દુર્ગંધના કારણે તેણે ત્રણ-ચાર દિવસ પહેલા આપઘાત કર્યો હોવાનું પોલીસે અનુમાન લગાવ્યું હતું. પોલીસની પ્રાથમિક તપાસમાં મૃતક નરેશ ઉર્ફે પપ્પુડો દશરથભાઈ સોલંકી હોવાનું બહાર આવ્યું હતું. પોલીસનું માનવું છે કે તેણે કોઈ અગમ્ય કારણોસર ગળેફાંસો ખાઈને આત્મહત્યા કરી છે. મૃતકના સગા દિપકભાઈ પરમારની ફરિયાદના આધારે પોલીસે અકસ્માત મોતનો ગુનો નોંધી લાશને ડીસા સિવિલ હોસ્પિટલ ખાતે ખસેડી વધુ તપાસ હાથ ધરી છે.