ખેડૂતોને વધુને વધુ સજીવ ખેતી તરફ પ્રોત્સાહિત કરવા માટે, કેન્દ્ર સરકાર અટલ ભુજલ યોજના હેઠળ ખેડૂતોને વિનામૂલ્યે ઓર્ગેનિક બીજ દવા ખાતરની કીટનું વિતરણ કરી રહી છે. ત્યારે ડીસા ગામના ખેડૂતો કિટ મેળવવા માટે ભારે હાલાકી ભોગવી રહ્યા હતા. સમગ્ર તાલુકામાં માત્ર એક જ કેન્દ્રને કારણે વિતરણ વ્યવસ્થામાં ભારે અવ્યવસ્થાના કારણે ખેડૂતોમાં રોષ જોવા મળ્યો હતો. અટલ ભુજલ યોજના પાયલોટ પ્રોજેક્ટ હેઠળ, કેન્દ્ર સરકારે ખેડૂતોને સજીવ ખેતી અપનાવવા પ્રોત્સાહિત કરવાના ઉદ્દેશ્ય સાથે કેટલાક જિલ્લાઓમાં ખેડૂતોને જૈવિક ખાતર, બિયારણ અને દવાની કીટનું મફત વિતરણ કરવાની યોજના અમલમાં મૂકી છે. બનાસકાંઠા જિલ્લા સહિત ગુજકોમાસોલ દ્વારા દરેક તાલુકા કક્ષાએ તેનું વિતરણ કરવામાં આવી રહ્યું છે. ડીસા તાલુકાના કુલ 3157 ખેડૂતોને કીટ આપવાનું આયોજન છે. પરંતુ ડીસાના ઘોરૂલમાં ગુજકોમાસોલના કેન્દ્રમાં કિટ એકત્રિત કરવા મોટી સંખ્યામાં ખેડૂતો એકઠા થતાં અરાજકતા સર્જાઈ હતી. ખેડૂતોના જણાવ્યા મુજબ ઘણા ખેડૂતો બે-ત્રણ દિવસથી પરેશાન છે. તેમને ટોકન્સ મળતા નથી. આજે પણ સવારના ચાર વાગ્યાથી જ તમામ કામકાજ છોડી ખેડૂતો કતારો લગાવવા લાગ્યા હતા. પરંતુ કેન્દ્ર ખુલતાની સાથે જ ખેડૂતોએ એકસાથે હોબાળો મચાવતા વિતરણ વ્યવસ્થામાં ભારે અવ્યવસ્થા સર્જાઈ હતી.
કીટ લેવા આવેલા ખેડૂતો ગેનાજી, જીવાજી અને રમેશભાઈએ જણાવ્યું કે તેઓ સવારના 4-5 વાગ્યાથી કતારમાં ઉભા હતા. પરંતુ, પાંચ-સાત કલાક થવા છતાં હજુ સુધી સેન્ટર ખુલ્યું નથી. છેલ્લા ત્રણ દિવસથી અનેક ખેડૂતો આવી રહ્યા છે પરંતુ કલાકો સુધી ઉભા રહેવા છતાં કિટ લેવા માટે ટોકન પણ મળતા નથી. દરરોજ સવારથી 500 થી 700 ખેડૂતો કિટ લેવા સેન્ટર પર આવે છે. જો સરકાર વધુ કેન્દ્રો ફાળવે તો ખેડૂતોને સરળતાથી કિટ મળી શકશે.