ડીસા નજીક ભીલડી પાલડી રોડ પર બોલેરો અને ઈકો કાર વચ્ચે સામસામે અથડાતા અકસ્માત સર્જાયો હતો. અકસ્માતમાં ગંભીર રીતે ઘવાયેલા ત્રણ લોકોને વધુ સારવાર માટે ભીલડી બાદ પાલનપુરની સરકારી હોસ્પિટલમાં ખસેડવામાં આવ્યા છે.ડીસા તાલુકાના ભીલડીથી પાલડી તરફના સિંગલ લેન રોડ પર ઇકો કાર અને બોલેરો વચ્ચે અકસ્માત સર્જાયો હતો. જેમાં પ્રવીણભાઈ મગનભાઈ ઠાકોર (ઉંમર 22, રહે. પાલડી), ટીનાજી મગનજી દરબાર (ઉંમર 33, રહે. પાલડી) અને સુરેશભાઈ પશાભાઈ રાવલ (ઉંમર 45, રહે. પાલડી) પાલડી ગામ, ઈકો ગાડી પાલનપુર જવા નીકળ્યા હતા. તેઓ ભીલડીથી પાલડી રોડ પરથી પસાર થઈ રહ્યા હતા, ત્યારે સામેથી આવતી બોલેરોના ચાલકે અચાનક સ્ટિયરિંગ પરનો કાબુ ગુમાવી દીધો હતો અને ઈકો સાથે અથડાઈ હતી.
અકસ્માતમાં ત્રણ લોકો ગંભીર રીતે ઘાયલ થયા હતા. દુર્ઘટના બાદ આસપાસના લોકો તાત્કાલિક ત્યાં પહોંચી ગયા હતા અને રાહત કાર્ય શરૂ કર્યું હતું. ઇજાગ્રસ્તોને લોહીલુહાણ હાલતમાં કારમાંથી બહાર કાઢી 108 એમ્બ્યુલન્સ વાન મારફતે ભીલડીની સરકારી હોસ્પિટલમાં સારવાર માટે લઇ જવાયા હતા. જ્યાં પ્રાથમિક સારવાર બાદ ઇજાગ્રસ્તોની હાલત વધુ ગંભીર બનતા તમામને વધુ સારવાર અર્થે પાલનપુર હોસ્પિટલમાં મોકલી આપવામાં આવ્યા હતા.