આજે ડીસામાં લાયન્સ હોલ પાસે ખોદકામ દરમિયાન બાજુની દિવાલ ધરાશાયી થતાં એક મજૂર દટાયો હતો. ઘટના બાદ આસપાસના લોકો રાહત કાર્યમાં જોડાયા હતા અને તાત્કાલિક મજૂરને સારવાર માટે બહાર કાઢ્યા હતા.ડીસામાં લાયન્સ હોલ પાસે ડિમ્પલ ટોકીઝ તરફ જતા રોડ પર એક શોપિંગ મોલના પાયામાં ખોદકામ ચાલી રહ્યું હતું. જેમાં છોટા ઉદેપુરના રહેવાસી દલસિંગભાઈ અને ભીમાભાઈ પાયો ખોદી રહ્યા હતા. તે જ સમયે અચાનક પડોશના મકાનની દિવાલ ધરાશાયી થઈ હતી. ઘટના બાદ એક મજૂર બહાર દોડી ગયો હતો. દલસિંગભાઈ દિવાલ નીચે દટાઈ જતાં હોબાળો મચી ગયો હતો. ઘટના બાદ આસપાસના લોકો તાત્કાલિક ત્યાં પહોંચી ગયા હતા અને રાહત કાર્ય શરૂ કર્યું હતું. એક કલાકની જહેમત બાદ સ્થાનિક લોકોએ દટાયેલા મજૂરને બહાર કાઢ્યો હતો અને તેને સારવાર માટે હોસ્પિટલ લઈ ગયા હતા.
આ બનાવ અંગે હિતેશભાઈ મોઢા અને ભીમાભાઈએ જણાવ્યું કે, શોપિંગ સેન્ટર બનાવવા માટે પાયાનું ખોદકામ ચાલી રહ્યું હતું, તે જ સમયે અચાનક બાજુની દિવાલ ધરાશાયી થઈ હતી અને તેની નીચે એક મજૂર દટાઈ ગયો હતો. લગભગ એકથી દોઢ કલાકની જહેમત બાદ મજૂરને હેમખેમ બહાર કાઢી સારવાર માટે ખસેડાયો હતો. તેમણે વધુમાં જણાવ્યું હતું કે જો કે, આ કામગીરી દરમિયાન કોન્ટ્રાક્ટર દ્વારા સલામતીના કોઈ નિયમોનું પાલન કરવામાં આવ્યું ન હતું. સદનસીબે કામદારોનો આબાદ બચાવ થયો હતો, પરંતુ આવા શોપિંગ મોલના નિર્માણ વખતે સલામતીમાં બેદરકારી દાખવનાર કોન્ટ્રાક્ટરો સામે પાલિકાએ કાર્યવાહી કરવી જોઈએ.