ડીસા સહિત સમગ્ર બનાસકાંઠા જિલ્લામાં ભૂસ્તર અધિકારી દ્વારા આડેધડ દંડ વસુલવામાં આવતા રેતીના લીઝ ધારકોએ હડતાળનું શસ્ત્ર ઉપાડીને ખાણો બંધ કરાવી તંત્ર સામે રોષ ઠાલવ્યો છે. આથી સરકારને કરોડો રૂપિયાની રોયલ્ટીની આવકનું નુકસાન વેઠવું પડે છે. ડીસામાં પણ 25 જેટલી રેતીની ખાણો આવેલી છે. જ્યારે જિલ્લામાં 250 જેટલી રેતીની ખાણો આવેલી છે. તાજેતરમાં, બનાસકાંઠા જિલ્લાના કાંકરેજ તાલુકાના કંબોઇ ખાતે એસઓજીની ટીમે નદીમાં લીઝ સિવાયના વિસ્તારોમાં કાર્યરત ત્રણ હિટાચી મશીનો જપ્ત કર્યા હતા. જે બાદ પોલીસે બનાસકાંઠા ભૂસ્તર વિભાગને જાણ કરતાં ભૂસ્તર અધિકારીએ ત્રણ લીઝ ધારકોને ભારે દંડ ફટકાર્યો હતો. જિલ્લામાં મોટા પ્રમાણમાં રેતીની ખાણો હોવાના કારણે ભૂસ્તર વિભાગની ટીમ સતત ચેકિંગ કરી રહી છે. ત્યારે નદીમાં ચાલતા મશીનને પકડવાનું કામ ભૂસ્તર વિભાગનું છે. જો કે, પોલીસ ખોટી રીતે મશીન જપ્ત કરીને હેરાન કરે છે અને ભૂસ્તર અધિકારી આડેધડ દંડ વસૂલતા હોવાથી લીઝ ધારકોમાં રોષ છે. જેની સામે છેલ્લા બે દિવસથી પટ્ટાવાળાઓ હડતાળ પર ઉતરી ગયા છે અને તમામ ખાણો બંધ કરી દીધી છે.