સ્થાનિક લોકોએ દાહોદ ગ્રામ્ય પોલીસ સ્ટેશનમાં હંગામો કર્યો હતો. સમગ્ર ઘટના પર નજર કરીએ તો પોલીસ દારૂની હેરાફેરી કરતા યુવકોને પકડવા પાછળ પડી હતી. પોલીસે એક યુવકને ચાલતા વાહનમાં લાકડી વડે મારતાં બે યુવકો ઘાયલ થયા હતા. જે બાદ ઈજાગ્રસ્તને સારવાર માટે હોસ્પિટલ લઈ જવામાં આવ્યો હતો જ્યાં સારવાર દરમિયાન એક યુવકનું મોત નીપજ્યું હતું.
યુવકના મોત બાદ મામલો વધુ ગરમાયો હતો, સ્થાનિક લોકોએ લાશને પોલીસ સ્ટેશનમાં મૂકી દીધી હતી અને મૃતદેહ ન લેવા પર મક્કમ રહ્યા હતા. બનાવ સંદર્ભે એલસીબી એસઓજી સહિતનો પોલીસ કાફલો પણ દાહોદ ગ્રામ્ય પોલીસ મથકે બોલાવવાની ફરજ પડી હતી. જે બાદ સ્થાનિક લોકોના ઉગ્ર વિરોધને જોતા પોલીસે હળવો લાઠીચાર્જ પણ કર્યો હતો. હાલ પોલીસ અને સ્થાનિક આગેવાનો વચ્ચે મામલો શાંત પાડવા માટે વાતચીત ચાલી રહી છે.