મુંબઈઃ સ્પોન્જ આયર્ન ઉત્પાદકોએ દેશમાંથી લો-ગ્રેડ આયર્ન ઓરની નિકાસ પર નિકાસ જકાત લાદવાની માંગ કરી છે. સ્થાનિક સ્તરે આયર્ન ઓરની અછત અને ઊંચા ભાવને ઘટાડવા માટે આ માંગ કરવામાં આવી છે.
ભારત ક્રૂડ સ્ટીલનો બીજો સૌથી મોટો ઉત્પાદક દેશ છે. અને સ્ટીલ ઉત્પાદન માટે આયર્ન ઓર મુખ્ય કાચો માલ છે.
સ્પોન્જ આયર્ન મેન્યુફેક્ચરર્સ એસોસિએશનના એક અધિકારીએ જણાવ્યું હતું કે, આયર્ન ઓરની અછત હોવાથી સરકારને નિકાસ ડ્યુટી લાદવાની વિનંતી કરવામાં આવી છે.
દેશમાં સ્પોન્જ આયર્નના લગભગ 335 એકમો છે અને ભારત વિશ્વમાં સ્પોન્જ આયર્નનું સૌથી મોટું ઉત્પાદક છે. ભારતમાં સ્પોન્જ આયર્નનું વાર્ષિક ઉત્પાદન પાંચ કરોડ ટન છે જેનો ઉપયોગ મોટાભાગના ગૌણ સ્ટીલ ઉત્પાદકો દ્વારા કાચા માલ તરીકે થાય છે.
ચાલુ નાણાકીય વર્ષના પ્રથમ નવ મહિનામાં આયર્ન ઓરની નિકાસ 32.22 મિલિયન ટન રહી હતી, જે ગયા નાણાકીય વર્ષના સમાન સમયગાળામાં 9.5 લાખ ટન હતી. ભારતની મોટાભાગની આયર્ન ઓરની નિકાસ ચીનમાં થાય છે.
નવેમ્બર 2022માં સરકારે આયર્ન ઓર પર નિકાસ કર નાબૂદ કર્યા પછી આયર્ન ઓરની નિકાસમાં વધારો થયો છે. બીજી તરફ ફેડરેશન ઓફ ઈન્ડિયન મિનરલ ઈન્ડસ્ટ્રીઝ દ્વારા એક્સપોર્ટ ટેક્સની માંગનો વિરોધ કરવામાં આવ્યો છે. ભારતમાંથી માત્ર નીચા ગ્રેડના આયર્ન ઓરની નિકાસ કરવામાં આવે છે, જેનો ભારતમાં વધુ વપરાશ થતો નથી.