આ સમયે નેપાળથી એક મોટા સમાચાર સામે આવી રહ્યા છે. અહીં છ લોકો સાથેનું એક હેલિકોપ્ટર ગુમ થયું છે. સમાચાર મુજબ છ લોકોને લઈ જતું હેલિકોપ્ટર માઉન્ટ એવરેસ્ટ નજીક ગુમ થઈ ગયું છે.
હેલિકોપ્ટરમાં 5 વિદેશી નાગરિકો
નેપાળમાં 6 લોકો સાથે હેલિકોપ્ટર ગુમ થવા અંગે માહિતી અધિકારી જ્ઞાનેન્દ્ર ભુલે જણાવ્યું કે, હેલિકોપ્ટર સોલુખુમ્બુથી કાઠમંડુ જઈ રહ્યું હતું અને સવારે 10 વાગ્યે કંટ્રોલ ટાવર સાથે સંપર્ક તૂટી ગયો. કોલ સાઇન 9NMV ધરાવતું હેલિકોપ્ટર સવારે 10:12 વાગ્યે (સ્થાનિક સમય) રડારથી દૂર ગયું હતું. જણાવવામાં આવી રહ્યું છે કે ગુમ થયેલા હેલિકોપ્ટરમાં 5 વિદેશી નાગરિકો હતા.
ટેક ઓફ થયાના 15 મિનિટ પછી સંપર્ક તૂટી ગયો
ત્રિભુવન ઈન્ટરનેશનલ એરપોર્ટના જનરલ મેનેજર પ્રતાપ બાબુ તિવારીએ આ બાબત વિશે જણાવ્યું કે 9N-AMV હેલિકોપ્ટર ઉડાન ભર્યાના 15 મિનિટ પછી જ સંપર્ક તૂટી ગયો. નેપાળના નાગરિક ઉડ્ડયન પ્રાધિકરણના માહિતી અધિકારી જ્ઞાનેન્દ્ર ભુલને ટાંકીને ‘કાઠમંડુ પોસ્ટ’ અખબારે આપેલી માહિતી અનુસાર, હેલિકોપ્ટરે સોલુખુમ્બુના સુરકીથી રાજધાની કાઠમંડુ માટે સવારે 9.45 વાગ્યે ઉડાન ભરી હતી.
‘હિમાલયન ટાઈમ્સ’ અખબારે એક સ્ત્રોતને ટાંકીને જણાવ્યું હતું કે પ્રાથમિક અહેવાલો અનુસાર, હેલિકોપ્ટરમાં પાયલટ ચેત ગુરુંગ સહિત કુલ છ લોકો સવાર છે.