પાકિસ્તાનમાં ગુરુવારે યોજાનારી સામાન્ય ચૂંટણી માટે લગભગ 6,50,000 સુરક્ષાકર્મીઓ તૈનાત કરવામાં આવ્યા છે. અધિકારીઓએ જણાવ્યું કે આ ચૂંટણીમાં 12.85 કરોડથી વધુ નોંધાયેલા મતદારો મતદાન કરશે.
ચૂંટણીના એક દિવસ પહેલા બલૂચિસ્તાનમાં જોરદાર વિસ્ફોટ, 25ના મોત
પાકિસ્તાનમાં સામાન્ય ચૂંટણીના એક દિવસ પહેલા બુધવારે બલૂચિસ્તાન પ્રાંતમાં ચૂંટણી કાર્યાલયોને નિશાન બનાવતા બે બોમ્બ વિસ્ફોટોમાં ઓછામાં ઓછા 25 લોકો માર્યા ગયા અને 42 અન્ય ઘાયલ થયા.
મતદાન સવારે 8 વાગ્યાથી શરૂ થશે અને સાંજે 5 વાગ્યા સુધી ચાલશે
‘રેડિયો પાકિસ્તાન’ના સમાચાર અનુસાર મતદારોની સુરક્ષા સુનિશ્ચિત કરવા માટે લગભગ 6,50,000 સુરક્ષાકર્મીઓ તૈનાત કરવામાં આવ્યા છે. જેમાં પોલીસ, સિવિલ સશસ્ત્ર દળો અને સશસ્ત્ર દળોના જવાનોનો સમાવેશ થાય છે. ગુરુવારે સવારે 8 વાગ્યાથી મતદાન શરૂ થશે અને સાંજે 5 વાગ્યા સુધી ચાલશે.
5121 ઉમેદવારો ચૂંટણી મેદાનમાં છે
પાકિસ્તાનના ચૂંટણી પંચ (ECP) અનુસાર, કુલ 12,85,85,760 નોંધાયેલા મતદારો મતદાન કરવા પાત્ર છે. નેશનલ એસેમ્બલી સીટ માટે 5,121 ઉમેદવારો મેદાનમાં છે, જેમાં 4,807 પુરૂષો, 312 મહિલાઓ અને બે ટ્રાન્સજેન્ડરનો સમાવેશ થાય છે. ચાર પ્રાંતીય એસેમ્બલી માટે 12,695 ઉમેદવારો મેદાનમાં છે, જેમાં 12,123 પુરૂષો, 570 મહિલાઓ અને બે ટ્રાન્સજેન્ડરનો સમાવેશ થાય છે.
પંજાબમાં સૌથી વધુ 7,32,07,896 નોંધાયેલા મતદારો છે.
ECP ડેટા અનુસાર, પંજાબમાં સૌથી વધુ 7,32,07,896 નોંધાયેલા મતદારો છે, ત્યારબાદ સિંધમાં 2,69,94,769, ખૈબર પખ્તુનખ્વા 2,19,28,119, બલૂચિસ્તાનમાં 53,71,947 અને રાજધાની ઇસ્લામાબાદમાં 10, 83,029. છે.
પાકિસ્તાનમાં 16,766 મતદાન મથકો અત્યંત સંવેદનશીલ છે
માહિતી અનુસાર, ECP એ દેશભરમાં 9,07,675 મતદાન મથકો સ્થાપ્યા છે, જેમાં 25,320 પુરુષ મતદારો માટે, 23,952 મહિલાઓ માટે અને અન્ય 41,403 મિશ્ર મતદાન મથકોનો સમાવેશ થાય છે. ECP અનુસાર, 44,000 મતદાન મથકો સામાન્ય છે જ્યારે 29,985 સંવેદનશીલ અને 16,766 અતિસંવેદનશીલ જાહેર કરવામાં આવ્યા છે.
ચૂંટણી પર આતંકવાદી હુમલાની ધમકી
આતંકવાદી જૂથો તરફથી હુમલાના ખતરાથી સુરક્ષા વ્યવસ્થા સઘન કરવામાં આવી છે. ટેલિકોમ રેગ્યુલેટર, પાકિસ્તાન ટેલિકોમ્યુનિકેશન ઓથોરિટી (PTA) એ અફવાઓને ફગાવી દીધી છે કે ચૂંટણીના દિવસે ઇન્ટરનેટ સેવાઓ બંધ કરવામાં આવશે.