પાલનપુરના હરીપુરા વિસ્તારમાં જર્જરિત રસ્તાઓના કારણે સ્થાનિક લોકોને ભારે હાલાકીનો સામનો કરવો પડી રહ્યો છે. છેલ્લા 4 મહિનાથી રસ્તાઓ ઉબડખાબડ બની ગયા છે. અનેકવાર આજીજી કરવા છતાં પણ મહિલાઓની ધીરજનો પાર ન છૂટ્યો. આજે વિસ્તારની મહિલાઓ રસ્તા પર ઉતરી આવી હતી અને સૂત્રોચ્ચાર કરી પાલિકાના કાઉન્સિલરો અને અધિકારીઓ સામે વિરોધ નોંધાવ્યો હતો. વારંવાર રજુઆત કરવા છતાં રોડનું સમારકામ કે નવો રોડ ન બનાવવાના કારણે મહિલાઓને રસ્તા પર આવવાની ફરજ પડી હતી. પાલનપુરના હરીપુરા વિસ્તારમાં રસ્તાના મુદ્દે મહિલાઓએ નગર પાલિકા હાય હાયના નારા લગાવ્યા હતા. પાલિકાના અધિકારીઓ સ્થાનિક લોકોની વાત સાંભળતા ન હોવાના આક્ષેપ સાથે સ્થાનિક મહિલાઓએ વિરોધ કર્યો હતો. છેલ્લા ચાર માસથી હરીપુરા વિસ્તારમાં તૂટેલા રસ્તાઓ અને ખાડાઓના કારણે સ્થાનિક લોકોને વાહન વ્યવહારમાં ભારે મુશ્કેલીનો સામનો કરવો પડી રહ્યો છે.સ્થાનિક લોકોનો આક્ષેપ છે કે રોડ પર પડવાથી સગર્ભા મહિલાઓ અને વૃદ્ધોને પણ ઈજાઓ થઈ છે. છેલ્લા ચાર માસમાં અનેક વખત રજુઆત કર્યા બાદ પણ રોડનું સમારકામ કે નવો રોડ ન બનાવવાના કારણે ગરીબ મહિલાઓએ એક થઈને રસ્તા પર ઉતરવાની ફરજ પડી છે. આજે તેઓએ રોડ પર દેખાવો કર્યા છે, પરંતુ જો નજીકના ભવિષ્યમાં રોડનું સમારકામ કરવામાં નહીં આવે તો મહિલાઓ ઉગ્ર આંદોલન કરશે તેવી ચીમકી પણ આપી છે.