નવી દિલ્હીઃ મુંબઈના વાનખેડે સ્ટેડિયમમાં મુંબઈ અને વિદર્ભ વચ્ચે રણજી ટ્રોફીની ફાઈનલ મેચ રમાઈ રહી છે. મુંબઈના બેટ્સમેનોએ પ્રથમ દાવમાં 224 રન અને બીજા દાવમાં 418 રન બનાવ્યા હતા. જેના જવાબમાં વિદર્ભની ટીમ પ્રથમ દાવમાં માત્ર 105 રનમાં ઓલઆઉટ થઈ ગઈ હતી અને મુંબઈને મોટી લીડ મળી હતી. ટાર્ગેટનો પીછો કરવા આવેલી વિદર્ભની ટીમની શરૂઆત બહુ સારી રહી ન હતી, શરૂઆતી આંચકા સહન કર્યા બાદ પહેલા કરુણ નાયરે શાનદાર ઇનિંગ રમી અને પોતાની ટીમ માટે 74 રન બનાવ્યા. આ પછી તે મુશીર ખાનનો શિકાર બન્યો. કરુણની વિકેટ પડ્યા બાદ મુંબઈ માટે આ મેચ એકતરફી લાગી હતી પરંતુ વિદર્ભના કેપ્ટન અક્ષય વાડકર અને હર્ષ દુબેએ સાથે મળીને વિદર્ભ ટીમની કમાન સંભાળી હતી અને સારી ભાગીદારી કરી હતી. અક્ષય વાડેકરે કેપ્ટનશિપની ઇનિંગ રમતા સદી ફટકારી હતી અને હર્ષ દુબેએ પણ કેપ્ટનને ખૂબ જ સારો સાથ આપ્યો હતો. આ દરમિયાન હર્ષે પોતાની અડધી સદી પણ પૂરી કરી હતી. તમને જણાવી દઈએ કે આજે રણજી ટ્રોફી ફાઈનલનો છેલ્લો દિવસ છે. સારી ઈનિંગ્સ રમ્યા બાદ મુંબઈએ કેપ્ટન અક્ષય અને હર્ષ બંનેની વિકેટ ઝડપી હતી. વિદર્ભની ટીમને જીતવા માટે હજુ 175 રનની જરૂર છે અને તેના હાથમાં માત્ર 2 વિકેટ છે. સુકાની અક્ષય અને હર્ષની વિકેટો પડી ગયા બાદ મુંબઈનો વિજયનો માર્ગ સરળ જણાય છે. વિદર્ભની ટીમ દ્વારા એકતરફી ફાઈનલને રસપ્રદ બનાવી દેવામાં આવી હતી પરંતુ મુંબઈના બોલરોએ યોગ્ય સમયે વિકેટ લઈને ટીમમાં વાપસી કરી હતી. રણજીના ઈતિહાસમાં મુંબઈ સૌથી સફળ ટીમ રહી છે. જો મુંબઈ આ વર્ષે પણ જીતે છે તો તેમના માટે રણજીમાં આ 42મું ટાઈટલ હશે. આ વર્ષે મુંબઈની કપ્તાની અજિંક્ય રહાણેએ સંભાળી છે. રણજી બાદ તે સીધો તેની આઈપીએલ ટીમ ચેન્નાઈમાં જોડાશે અને આઈપીએલમાં રમતા જોવા મળશે.