બનાસકાંઠા જિલ્લો બટાકાના ઉત્પાદનનું હબ ગણાય છે ત્યારે ગત વર્ષે બટાકાના ભાવમાં ઘટાડો થતાં ખેડૂતોને બટાટા કોલ્ડ સ્ટોરેજમાં રાખવાની ફરજ પડી હતી. બટાટાના ભાવમાં ભારે ઘટાડાથી ખેડૂતો ચિંતિત હતા ત્યારે સરકારે બટાટાને કોલ્ડ સ્ટોરેજમાં રાખવા માટે સહાયની જાહેરાત કરી હતી. 8 માસ જેટલો સમય વીતી ગયો હોવા છતાં હજુ સુધી ખેડૂતોને બટાકાની સહાય મળી નથી જેના કારણે ખેડૂતોમાં રોષ જોવા મળી રહ્યો છે. બનાસકાંઠા જિલ્લામાં બટાકાનું મોટા પ્રમાણમાં વાવેતર થાય છે. પાલનપુર, વડગામ, ડીસા, ધાનેરા દિયોદર, દાંતીવારા વગેરે તાલુકાઓમાં બટાકાનું મોટા પ્રમાણમાં વાવેતર થઇ રહ્યું છે. ગત વર્ષે બટાકાનું જંગી ઉત્પાદન થયું હતું. જો કે ભાવ ન મળવાના કારણે ખેડૂતોને નુકશાની વેઠવી પડી હતી. બટાકાની ખેતીમાં ખેડૂતોને ઘણું ઉત્પાદન મળ્યું પરંતુ બટાકાના ભાવ નીચા ગયા અને તેના કારણે બટાટા બગડતા ખેડૂતોને બટાકાને કોલ્ડ સ્ટોરમાં રાખવાની ફરજ પડી હતી. મોટાભાગના ખેડૂતોએ પ્રાપ્ત બટાટા કોલ્ડ સ્ટોરમાં સંગ્રહ કર્યા હતા. જો કે, જ્યારે ખેડૂતો બટાકાનો સંગ્રહ કરવા માટે ભાડું ચૂકવી શકતા ન હતા, ત્યારે તેઓએ સરકાર પાસે મદદ માંગી હતી. ત્યારે સરકારે 600 કટ્ટાની મર્યાદા સુધી પ્રતિ કટ્ટા રૂ.50ના દરે સહાયની જાહેરાત કરી હતી. પરંતુ, છેલ્લા આઠ-નવ માસ જેટલો સમય વીતી જવા છતાં હજુ સુધી બટાકાની સહાય ન મળતાં ખેડૂતો નિરાશ થયા છે. તેઓ માંગ કરી રહ્યા છે કે ખેડૂતોના ખાતા ખોલવામાં આવે અને સરકાર વહેલી તકે સહાય ચૂકવે. બનાસકાંઠા જિલ્લામાં વિવિધ 200 કોલ્ડ સ્ટોરેજમાં ખેડૂતોએ તેમના બટાકાનો સંગ્રહ કર્યો હતો. સરકારના ધારાધોરણ મુજબ ખેડૂતોને સરકારી સહાય ચૂકવવાની જાહેરાત કરવામાં આવી હતી. જો કે છેલ્લા કેટલાક મહિનાઓ વીતી જવા છતાં પણ ખેડૂતોને આ બટાટા સંગ્રહની સહાયની રકમ ચૂકવવામાં આવી નથી. ખેડૂતોની માંગ છે કે જો સહાયની રકમ તાત્કાલિક ચૂકવવામાં આવે તો ખેડૂતો તે નાણાંનો ઉપયોગ નવા વાવેતરમાં કરી શકશે. જો કે બટાકાની સહાય સંદર્ભે જિલ્લા બાગાયત અધિકારીનું કહેવું છે કે જિલ્લામાં 41 હજારથી વધુ અરજીઓ આવી છે. સરકાર દ્વારા જે સહાયની જાહેરાત કરવામાં આવી હતી તે આવી અને તે તમામ અરજીઓની ચકાસણી કરવામાં આવી. હવે તમામ પ્રક્રિયા પૂર્ણ થઈ ગઈ છે, દોઢ મહિનામાં સહાયની રકમ ખેડૂતોના ખાતામાં પહોંચી જશે.