કોઈપણ વાહન માલિકે સમયસર વાહનની જાળવણી કરવી પડે છે અને જો સેવા સમયસર ન થાય તો વાહનોમાં આગ લાગવાના બનાવો ઝડપથી બને છે. ત્યારે આવી જ એક ઘટના બાયડના કપડવંજ હાઇવે પર બની હતી. આજે બાયડમાં નડિયાદ-કપડવંજ હાઈવે પર એક કાર ચાલક પસાર થઈ રહ્યો હતો. દરમિયાન અચાનક કારમાં આગ લાગી હતી. અચાનક કારમાંથી ધુમાડો નીકળવા લાગ્યો, ત્યારબાદ ડ્રાઈવરે કાર રોકી અને કારમાં સવાર તમામ લોકોને નીચે ઉતાર્યા. કારમાં આગ લાગતા સવિલા સોસાયટીની સામે રહીશો અને લોકોના ટોળા એકઠા થયા હતા. સાથે જ બાયડ પોલીસને જાણ કરતાં પોલીસ પણ ઘટના સ્થળે પહોંચી હતી. હાઇવે પર અચાનક એક કારમાં આગ લાગતાં ભારે જામ થઇ ગયો હતો. ફાયર ફાઈટર આવે તે પહેલા કાર સંપૂર્ણ રીતે આગની લપેટમાં આવી ગઈ હતી. જો કે ફાયર વિભાગે કારમાં લાગેલી આગ પર કાબુ મેળવ્યો હતો, પરંતુ ત્યાં સુધીમાં કાર સંપૂર્ણપણે બળીને ખાખ થઈ ગઈ હતી. કારમાં આગ કયા કારણોસર લાગી તે હજુ સુધી જાણી શકાયું નથી.