જિલ્લા કલેક્ટર એમ.નાગરાજનની અધ્યક્ષતામાં સતલાસણા ખાતે સ્વાતંત્ર્ય પર્વની જિલ્લા કક્ષાની ઉજવણીનું આયોજન કરવામાં આવ્યું છે. આ જિલ્લા કક્ષાના કાર્યક્રમને ધ્યાનમાં રાખીને જિલ્લા વહીવટી તંત્ર દ્વારા સ્થળ પર વ્યાપક તૈયારીઓ કરવામાં આવી છે. જિલ્લા કક્ષાના કાર્યક્રમની આખરી તૈયારીના ભાગરૂપે જિલ્લા કલેક્ટરની અધ્યક્ષતામાં સ્વાતંત્ર્ય પર્વના કાર્યક્રમનું રિહર્સલ હાથ ધરવામાં આવ્યું હતું. સતલાસણા અર્બુદ્ધ ધામ સંકુલના પ્રાંગણમાં જિલ્લા કક્ષાના 77માં સ્વાતંત્ર્ય પર્વનું આયોજન કરવામાં આવ્યું છે. જિલ્લા વિકાસ અધિકારી ડો.ઓમ પ્રકાશની અધ્યક્ષતામાં પરેડ, ધ્વજવંદન કાર્યક્રમ અને વિવિધ સાંસ્કૃતિક કાર્યક્રમોનું સુંદર રિહર્સલ કરવામાં આવ્યું હતું. આ પ્રસંગે યોગ નિદર્શન, દેશભક્તિ ગીત, ગરબા, વાંસળી ગીત, લોકનૃત્ય સહિતના વિવિધ સાંસ્કૃતિક કાર્યક્રમો રજૂ કરવામાં આવ્યા હતા. કોઠારી પ્રાથમિક શાળા સહિત જિલ્લાની શાળાઓના વિદ્યાર્થીઓ આવ્યા હતા. રિહર્સલમાં જિલ્લા પોલીસ અધિક્ષક અચલ ત્યાગી, નિવાસી અધિક કલેક્ટર ઈન્દ્રજીત સિંહ વાલા હાજર રહ્યા હતા.