માઉન્ટ આબુ જનારા મુસાફરો માટે મહત્વના સમાચાર સામે આવ્યા છે. પાલનપુર આબુ રોડ હાઇવે પર વરસાદના કારણે મસમોટા ખાડાઓના કારણે વાહનો અટવાઇ રહ્યા છે. જેના કારણે પોલીસ દ્વારા પાલનપુર-આબુ રોડ હાઇવે બંધ કરી દેવામાં આવ્યો છે. છેલ્લા 2 મહિનામાં બીજી વખત હાઇવે બંધ કરવામાં આવ્યો છે. પાલનપુર આબુ રોડ હાઇવે બંધ છે અને એરોમા સર્કલથી આબુ રોડ સુધી ડાયવર્ઝન આપવામાં આવ્યું છે.
સામાન્ય વરસાદમાં વાહનો ખાડાઓમાં ફસાઈ જાય છે. જેના કારણે પાલનપુર આબુ રોડ નેશનલ હાઇવે બંધ કરી દેવામાં આવ્યો છે. આ ઉપરાંત પાલનપુર એરોમા સર્કલથી આબુ રોડ રોડ સુધી 35 કિમીનું ડાયવર્ઝન આપવામાં આવ્યું છે. અમદાવાદથી આબુ તરફ જતા વાહનોને ચંડીસર વાઘરોલા થઈને ડાયવર્ટ કરવામાં આવ્યા છે. જેના કારણે પાલનપુર એરોમા સર્કલ પર વાહનોની લાંબી કતારો જોવા મળી રહી છે. અમદાવાદ અને અન્ય વિસ્તારોમાંથી રાજસ્થાન જતા અનેક વાહનચાલકો અટવાઈ પડ્યા હતા.