ડીસામાં રખડતા ઢોરને કારણે વધુ એક અકસ્માતનો બનાવ પ્રકાશમાં આવ્યો છે. રામસન હાઈવે પરથી પસાર થઈ રહેલ એક બાઇક સવાર અચાનક રોડની વચ્ચે ગાય આવી જતાં અકસ્માતનો ભોગ બન્યો હતો. જેમાં બે બાઇક સવારોને ગંભીર ઇજા થતાં સારવાર અર્થે ખસેડવામાં આવ્યા છે.
ડીસા તાલુકાના રામસણ ગામ પાસે હાઇવે પર બાઇક સવાર બે યુવકો વચ્ચે અકસ્માત સર્જાયો હતો. રામસણ નજીક હાઇવે પરથી મેઘાજી પાંચાજી ઠાકોર અને સંજયજી ગણેશજી ઠાકોર નામના બે યુવકો બાઇક લઇને પસાર થઇ રહ્યા હતા. ત્યારે જ અચાનક એક ગાય રોડની વચ્ચે આવી જતા અકસ્માત સર્જાયો હતો, બાઇક સવારે સ્ટીયરીંગ પરનો કાબુ ગુમાવી દીધો હતો અને ગાય સાથે અથડાયા બાદ રોડ પર પટકાતા બંને બાઇક સવારોને માથાના ભાગે ગંભીર ઇજાઓ થવા પામી હતી.
ઘટના બાદ 108 એમ્બ્યુલન્સ વાનની ટીમ તાત્કાલિક ઘટનાસ્થળે પહોંચી હતી અને ગંભીર રીતે ઘવાયેલા બંને યુવાનોને સારવાર માટે ડીસા સરકારી હોસ્પિટલમાં દાખલ કર્યા હતા. ઇજાગ્રસ્તોની હાલત વધુ ગંભીર હોવાથી તેઓને વધુ સારવાર માટે પાલનપુર સિવિલ હોસ્પિટલમાં ખસેડવામાં આવ્યા છે.